Оччотооҕу кэмҥэ тас капиталистическай дойдуларга барар дьон испииһэктэрин райком бюротунан бигэргэтэллэрэ. Ити процедураны этэҥҥэ ааһан, путевкабын илиибэр тутан, Дьокуускайга Курашов уулуссатыгар турар биэс этээстээх профсоюз дьиэтигэр тиийдим.

Японияҕа барааччылар бары онно муһуннубут. Манна бааллар эбит – күннэтэ телевизорынан көрөр-истэр сөбүлүүр дикторбыт Лира Белолюбская, «ТУ-154» самолет командира Сергей Сальников, уо. д.а. Итиэннэ испииһэккэ П. А.Ойуунускай аатынан Саха драматическай театрыттан Саха АССР үтүөлээх артыыһа Николай Попов кэргэнинээн, Үлэ Кыһыл Знамята орден кавалера, үтүөлээх тутааччы Люция Ефимовналыын бааллар диэтилэр.

Николай Петрович Попову, дьон таптаан, сөбүлээн көрөр артыыһын туһунан үгүстүк истэрим, кини ордук Н.Гоголь суруйуутунан «Кэргэн кэпсэтии» спектакльга олус табыллан оонньуурун астынарым. Тус бэйэтин билсэ илик буоламмын, Японияҕа кинилиин барар буолбуппуттан олус үөрбүтүм. Поповтар Хабаровскайга эрдэ көппүттэр этэ.

Биһигини Хабаровскай куоракка тиийбиппитигэр «Интурист» гостиницаҕа түһэрдилэр. Тиийбит киэһэбитигэр Японияҕа барааччылар мунньахтаатыбыт, быраабыла бөҕөтүн эттилэр. Дьэ онно көрдүм чугастан – маҥан дьураалаах, халлаан күөх көстүүмнээх, олус интеллигентнэй Николай Петрович Попову.

Кини номоҕон, нарын уонна бэрт спортивнай көстүүлээх кэргэнинээн Люция Ефимовалыын киирэн кэлбиттэрэ. Николай Петровиһы бары да билэр буоланнар, дьон суугунаһа түстүлэр – кэпсээн-ипсээн, күлүү-салыы да дэлэйдэ.

Нөҥүө күнүгэр поеһынан Находкаҕа айаннаан, сарсыарда муора пордугар, таможняҕа тиийдибит. Онно туристар Россия араас муннуктарыттан - Москваттан саҕалаан, Алтайтан, Сахалинтан, Бурятияттан, Читаттан, Хабаровскай кыраайтан, Камчаткаттан тиийэ кэлитэлээбиттэр. Хараабылбыт ССКП КК Генеральнай секретара Константин Черненко аатын сүгэр.

Аан бастаан муоранан айанныыр киһиэхэ хараабылбыт, дьэ, килэйэн-халайан, киэҥэ, сырдыга, үчүгэйэ сүрдээх. Икки күн айанныыгыт диэтилэр. Айан кэмигэр тэрээһин, араас куонкурус элбэх буолла. Регионнарынан бары көрүҥнэргэ куоталаһабыт. Онуоха биһиги, Саха сирин туристара, салайааччыбытынан Николай Петрович Попову биир санаанан таллыбыт.

Бастакы күммүтүгэр спорт араас көрүҥнэригэр күрэхтэһии ыытылынна. Онно остуол тенниһигэр барыларын ырааҕынан кыайдыбыт. Бу санаатахха, Люция Ефимовна уонна Николай Петрович теннискэ спорт маастардара эбиттэр. Оттон канат тардыһыытыгар эмиэ тулуппатыбыт. Саахымакка-дуобакка эмиэ тэҥнээхпитин булбатыбыт. Онтон талааны көрдөрөр куонкурустарга ырыаһыт кыргыттарбыт аатырдылар, уус-уран оҥоһук быыстапкатыгар эмиэ хайҕанныбыт. Онон, Саха сирин туристара аатырдыбыт. Ол барыта САССР үтүөлээх артыыһа Николай Петрович Попов иилээн-саҕалаан, кини көҕүлээһининэн ситиһиллибитэ. Бары Поповтар каюталарыгар түмсэрбит, кинилэр итии үүттээх чээйдэрин иһэ олорон, үгүһү-элбэҕи сэһэргэһэрбит.

Дьэ ити курдук, Японияҕа айаммыт кэмигэр артыыс Николай Попову кытта алтыспыт кэмим миэхэ олус күндү уонна умнуллубат. Николай Петровичтыын истинник доҕордоспуппут. Кэргэнинээн Люция Ефимовналыын олус эйэлээхтэрэ, бэйэ-бэйэлэрин өйдөһөллөрө.

Мин Николай Петровиһы артыыс быһыытынан, уобарастарын дьоһуннаахтык арыйарынан эмиэ олус ытыктыы саныыбын. Николай Попов дьиннээх норуот киһитэ этэ. Кинини доҕотторо уонна махталлаах көрөөччүлэрэ хаһан даҕаны умнуохтара суоҕа.