Үөһээ Бүлүү улууһун тыа хаһаайыстыбатын департаменын салайааччы Александр Андреев СИА-ҕа эппитинэн, билиҥҥи туругунан, сэттэ сылгыны тарпыттарын булбуттар. "Сүппүт эрээри, өссө да булулла иликтэр баар буолуохтарын сөп. Бу күннэргэ бөрөһүттэр биригээдэлэрин тэрийтэлээн эрэбит. Барыта түөртүү-биэстии киһилээх үс биригээдэ баар буолуо. Улуус суотуттан хас биирдии бөрө төбөтүгэр уоннуу тыһыынча солкуобайы анаатыбыт уонна бөрөһүттэри уматыгынан хааччыйыахпыт. Булчуттар саалара-сэптэрэ бэйэлэрин киэнэ", - диэтэ кини.

Үөдүгэй нэһилиэгин дьаһалтата иһитиннэрбитинэн, манна биир биригээдэ тэриллиэ. Бөрөлөр Өргүөт диэкиттэн кэлбиттэр. Маһа-ото хойуу буолан, бөртөлүөтүнэн сылдьан бултуурга табыгаһа суох, онон булчуттар бэргэн сааларыгар уонна былыргылыы хапкааннарыгар-туһахтарыгар эрэнэллэригэр тиийэллэр.