Харбалаах ыала Ивановтар аҕалара Олег Степанович бултуу сылдьан тыаттан тутан киллэрбит. Онно өссө кыра, биир-икки ыйдааҕа үһү. Мунан ытаан бэрилии сылдьар тайах оҕото -- ханнык баҕарар адьырҕаҕа кэбэҕэс булт. Ол иһин дьиэтигэр киллэрэргэ быһаарыммыт. “Ийэтин бэйэҥ өлөрбүтүҥ буолаарай?” – диэн аһаҕас ыйытыыга “Суох” диэн хоруйдаата. Атыыр тайах оҕотугар  “Хатан” диэн ааты биэрбиттэр.

 Аһылыга
Маҥнай “Нестожен” диэн оҕо үүтүнэн аһаппыттар. Ньирэйгэ курдук суосканан эмтэрбиттэр. Билигин, арыый бороохтуйбутугар, ас тобоҕун, хортуоска хаҕын кутан биэрэллэр, оту сиир. Корреспонденнар киирэрбитигэр Хатан хаппыт оҕурсу угун кэбийэ турара. Хойуу түүтэ саҥа үүнэн эрэр. 
Турар сирэ 
Тиэргэнтэн таһаарбаттар эбит, ыт тутуон сөп. Ивановтар киэҥ-куоҥ күрүөлээхтэр. Ол иһигэр сылдьар. “Кылаабынайа, кэлииккэни кичэйэн саба сылдьыахха наада”, - дииллэр. Киһи киирдэр эрэ утары сүүрэн кэлэр, ас көрдүүр. Төбөтүттэн имэрийдэххэ, хараҕын симэр, ыйылыыр. Сөбүлээбэтэҕинэ эргиллэ биэрээт, балайда ньүөлүтэрдик тэбэр. Ити курдук айылҕа оҕото Хатан иннинэн сирэйдээхтэр, иэгэйэр икки атахтаахтар ортолоругар олорор.

Инники дьылҕата
Дьиэ хаһаайкатыттан Валентина Сергеевнаттан Хатан инники дьылҕатын ыйыттыбыт. Эһиил идэһэ оҥостоллор дуу, зоопаркаҕа биэрэллэр дуу, тыаҕа ыыталлар дуу? Валентина Сергеевна кыылын аһынар эбит: “Айылҕата билиэ, тыатын диэки таластаҕына, тутуохпут суоҕа”. Саха сиригэр урут тайаҕы иитэн, оннооҕор көлүнэ сылдьыбыт түбэлтэлэрэ баар. Баҕар, бу тайах оҕото эмиэ көлүллэр миҥэ буолуо, баҕар, күөх тыатыгар көҥүлгэ ыытыахтара.