Иван Кондаков кэпсээбитинэн, норуот педагогикатын Ассоциацията оҕолору иитии үгэстэрин тарҕатыынан номнуо 20 сыл дьарыктанар. «Биһиги итини түөрт хайысханан ыытыахпыт: дьиэ кэргэн культуратын кииннэрин аһыы, үгэс буолбут аһылыгы киэҥник тарҕатыы, Чиряевскэй уонна да атын ааҕыылары ыытыы, ону таһынан «Эр киһи — учуутал» бырайыагы сайыннарыы. Кэнники бырайыак уолу иитиигэ эр киһи педагогическай иитиигэ оруолун бэлиэтээһин быһыытынан барыаҕа, -диэтэ ассоциация бэрэссэдээтэлэ Иван Кондаков. — Бэлиэтээн эттэххэ, биһиги хантан да үбүлэммэппит, общественнай саҕалааһын быһыытынан үлэлиибит».

Культура общественнай киинэ Дьокуускайга «Арчы» Дьиэтигэр сыл үлэлээтэ. Манна оҕо иитиитигэр лекциялары уонна кэпсэтиилэр ыытыллаллар, онно лектордарынан педагог эрэ үөрэхтээх дьон кыттыбаттар. Ол чаҕылхай холобурунан норуот маастара Борис Неустроев-Мандар буолар. 26 №-дээх оскуола социальнай педагога Матрена Аммосова этэринэн: «Үлэм быһыытынан төрөппүттэри кытта алтыһабын. Хомойуох иһин, олор ортолоругар арыгыны иһэр дьон бааллар. Ол курдук, Борис Неустроевы көрсүһүү кэнниттэн биир төрөппүт тосту уларыйда. Билигин кини испэт, оҕолору иитиигэ кыттар».

«Киин сүрүн сыалынан төрөппүттэри иитии буолар. Арчы дьиэтигэр үлэлиир киин олус туһалааҕа көһүннэ», -диэн санаатын үллэстэр педагог, ити санаа автора Любовь Аргунова.

Дьиэ кэргэн культуратын киинэ төрөппүттэри педагогическай, экологическай культураҕа, ыал иһигэр сыһыаннарга, аймах, ас культуратыгар үөрэтиэ.

Сотору кэминэн лидер-пропагандистар улуустарынан тарҕаһыахтара.

Пресс-конференцияҕа Дьокуускайдааҕы Оҕо Дыбарыаһын директорв Марита Колодезникова уонна куорат оскуолаларын учууталлара кытыннылар.