Форум аһыллыытын кэнниттэн «Эдэр суруналыыстар түмсүүлэрин» бэрэссэдээтэлин талыы буолла. Сүүс бырыһыан куолаһы ылан, «Умный город» интернет-сурунаал эрэдээктэрэ Елена Аргунованы (Аммосова) бэрэссэдээтэлинэн таллылар. 

Өрөспүүбүлүкэ биллэр суруналыыстара семинар ыыттылар, уопут үллэһиннилэр. Фотоаппарат кыаҕын, хаартыскаҕа түһэрии кистэлэҥин туһунан ХИФУ сонуннарга эрэдээксийэтиттэн Мичил Яковлев кэлэн кэпсээтэ, маастар-кылаас көрдөрдө. 

Оттон Виктория Габышева суут-сокуон туһунан суруйар хас биирдии суруналыыс быраабы, сокуону билэрэ наадатын таһынан, күүстээх, тулуурдаах, кытаанах характер эмиэ ирдэнэрин эттэ. Суруналыыстыка бу көрүҥэ олус сэрэхтээх. Араас кыра сыыһа-халты суруйуугуттан, кырата ыстыраапка түбэһиэххин сөп. Ону таһынан, суруналыыс матырыйаалын оҥороругар ханнык быраабылалары тутуһуохтааҕын туһунан Роскомнадзор салайааччытын солбуйааччы Ольга Кириллова сырдатта. Маны сэргэ, быйыл Москва куораттан үс СМИ уопуттаах суруналыыһа кэлэн эдэр дьоҥҥо бэйэлэрин хайысхаларынан лекциялары аахтылар, маастар-кылаастары ыыттылар. Mediatoolobox.ru сайты төрүттээчи Всеволод Пуля тиэкиһи интнернеккэ, хаһыакка, биллэриигэ дьон ордук хайа өттүн бастаан көрөрүн, хайдах кээмэйдээх тиэкискэ ордук болҕомто ууран туран ааҕарын о.д.а. туһунан эдэр суруналыыстарга туһалаах лиэксийэни аахта. 

Онтон, Александр Колесниченко матырыйаалы хайдах түргэнник суруйан туттарарга, интервьюну ылыыга, матырыйаалы хомуйууга сонун ньымалары кэпсээтэ. Телевидение суруналыыстарынаан Александр Макушин дьарыктанна.

Галина Алексеевна Бочкарева, СР Суруналыыстарын сойууһун бэрэссэдээтэлэ:

- Маннык форумнарга сылдьан эдэр суруналыыс элбэххэ үөрэнэр. Оччоҕуна эрэ үлэ түмүктээх буолар.  110 сайаапка биэрбиттэртэн аҕыйах киһи кэлэн кыттыбытыттан, хомойдум. Москваттан, аҕыйах хонукка улахан суруналыыстары, лектордары үлэлэриттэн көҥүллэтэн туран, эдэр дьон уопут ыллыннар диэн анаан аҕалбыппытын үрдүнэн, ким да кэлбэтэҕэ хомолтолоох. Ол да буоллар, форум олус кэрэхсэбиллээхтик ааста. Улуус хаһыатын суруналыыстара кэлэн кыттыыны ылбыттара киһини үөрдэр. Инникитин, бу форуммутун өссө сайыннарыахпыт, элбэх биллэр суруналыыстары ыҥырарга былаанныыбыт.