Суруналыыстар десаннарын “Саха сирэ” хаһыат “Эдэр саас” сыһыарыытын редактора Надежда Самсонова салайар. Надежда Алтайга ыытыллар түүр тыллаах Россия норуоттарын олимпиадатыгар үстэ кыттыбыта. Онон сылдьар сирин олоҕун-дьаһаҕын билсибит буолан, эдэр суруналыыстары киэҥ ис хоһоонноох программаҕа кытыннарар. Ол курдук, Литература сылынан сибээстээн Саха сирин эдэр суруналыыстара “Алтай кинигэтэ” диэн тэрээһиҥҥэ түүр тыллаах суруйааччылары кытта “төгүрүк остуол” ыыттылар. Алтайдааҕы ВГТРК-ҕа сылдьан эдэр коллегаларын үлэлэрин билистилэр, Горнай Алтай ыччаттарын общественнай түмсүүлэрин кытта көрсөн кэпсэттилэр, Алтайга олорор сахалары кытта көрсөн дойдуларын туһунан кэпсээтилэр.

Төннөн иһэн суруналыыстар Новосибирскай куоракка үөрэнэр устудьуоннар ыһыахтарыгар ыалдьыттыахтара уонна устудьуоннар хаһыаттарын үлэһиттэригэр маастар-кылаас ыытыахтара.

“Эдэр саас” сыһыарыы редактора Надежда Самсонова ыччат лидерин быһыытынан бу хаһыс да бырайыага. Онон эдэр суруналыыс баҕалаах ыччат соруннаҕына тугу барытын ситиһиэн сөбүн тус холобурунан көрдөрөр.