Ыалдьыттар саҥа оскуола киэҥ-куоҥ кылаастарын кэрийэн көрдүлэр, үөрэнээччилэри кытта кэпсэттилэр. Егор Борисов оҕолор ханнык идэлэри баһылыыр санаалаахтарын ыйыталаста. Онуоха үгүстэр үөрэхтэрин техническэй хайысхалаах үрдүк үөрэххэ салгыыр баҕалаахтарын эттилэр. «Эһиги республика эрэллэринэн буолаҕыт. Техничекэй идэлэр кэскиллээхтэр. Онон, кытаатан, иннигит диэки эрэллээхтик баран иһиҥ», - диэтэ Егор Борисов.

Спортивнай саалаҕа буолбут үөрүүлээх тэрээһиҥҥэ Егор Борисов Бороҕон олохтоохторун, учууталлары, үөрэнээччилэри гимназия саҥа дьиэтэ үлэҕэ киирбитинэн эҕэрдэлээтэ. Кини: «Үөрэнээччилэри кытта кэпсэтэн баран, кинилэр кэскиллэрин толкуйданар, үөрэххэ тардыһар ыччаттар эбит диэн түмүккэ кэллим. Бу уолаттар төрөөбүт Сахаларын сирин сайдыытыгар бэйэлэрин кылааттарын киллэриэхтэрэ диэн эрэнэбин», - диэн эттэ уонна «УАЗ» массыынаны ыларга сертификат туттарда.

Гимназия директорын солбуйааччы Рея Охлопковаҕа уонна гимназияны төрүттээбит, бастакы директорынан үлэлээбит Валентин Филипповка Саха Республикатын правительствотын Грамотата уонна Махтал суруга туттарылынна.

Үөрэнээччилэри уонна учууталлары Ил Түмэн председателэ Александр Жирков бу дьоро күнүнэн эҕэрдэлээтэ уонна робототехниканы бэлэхтээтэ.

Гимназияны төрүттээбит, РФ үтүөлээх учуутала Валентин Филиппов СИА корреспонденынаан үөрүүтүн үллэһиннэ. «Мантан антах үөрэнээччилэрбит сырдык, киэҥ-куоҥ оскуолаҕа үөрэниэхтэрэ. Үлэбитин саҥа саҕалыырбыт саҕана сүүсчэкэ үөрэнээччилээх этибит, билигин 200-тэн тахса буоллулар. Уолаттары эр санаалаах дьон буола улааталларыгар иитии суолтата олус улахан. Россияҕа биһиги курдук уолаттары эрэ үөрэтэр кыһа суох. Гимназиябыт сайдыы эркээйитин тутуһан иһиэ», - диэтэ кини.