Өссө түөрт сыллааҕыта, 2010 сыл бэс ыйыгар, накаастабылы толорор уорганнар бэйэлэрэ туспа Знамяланалларын туһунан РФ Президенин Ыйааҕа тахсыбыта. Знамя – сулууспаҕа бэриниилээх буолуу, эр санааланыы бэлиэтэ, чиэс уонна эппиэтинэс.

Бу күн сарсыардатыгар өрөспүүбүлүкэтээҕи управлениеҕа Знамя маһыгар тоһоҕолору саайыы сиэрэ-туома ураты быһыыга-майгыга толорулунна. Саалаҕа управление бастыҥ үлэһиттэрэ, бэтэрээннэр муһуннулар. Бастакы тоһоҕону управление начальнига, ис сулууспа полковнига Владимир Дзюба саайда. Кини кэнниттэн Москваттан кэлбит ыалдьыт, РФ НТФС кадрдарга управлениетын наҕараадаҕа уонна звание биэриигэ отделын начальнига, ис сулууспа подполковнига Матвей Новиков, управление начальнигын солбуйааччылар, холуонньалар начальниктара өтүйэни илииттэн илиигэ дьоһуннаахтык бэрсэн, уочаратынан саайдылар. Онтон Знамяны өрө көтөҕөн, знаменщикка туттарар чиэс өрөспүүбүлүкэ холуобунай-исполнительнэй систиэмэтин бэтэрээнэ, управление урукку начальнига, полковник Семен Яҥҥа сүктэрилиннэ. Тэрээһин Россия уонна Саха сирин гимнэринэн арыалланна.

Күнүстэн киэһэ А.Е.Кулаковскай аатынан Норуоттар доҕордоһууларын дьиэтигэр холуобунай-исполнительнай систиэмэ 400-кэ үлэһитэ, бэтэрээннэр сырыттылар. Бу дьоро түгэҥҥэ РФ НТФС дириэктэрин солбуйааччытын эбээһинэһин толорооччу, ис сулууспа генерал-майора Александр Гнездилов управление начальнига Владимир Дзюбаҕа Знамяны кытта РФ Президенин грамотатын туттарда. Дьоро киэһэ хор управление гимнин толоруутунан түмүктэннэ.