- Улуус, республика социальнай-экономическай сайдыытыгар бэйэтин кылаатын киллэрсэр, республикабыт ситэриилээх уонна сокуону оҥорор былаастарын үлэлэрин-хамнастарын улууска, өрөспүүбүлүкэҕэ тиһигин быспакка сырдатар «Сунтаар сонуннара» хаһыат редактор-директора Борис Николаев Ил Түмэн Бочуотунай грамотатынан, кыһыл көмүс чаһынан, улуус социальнай-экономическай сайдыытыгар тус бэйэтин кылаатын уонна үүнэр көлүөнэни иитиигэ өр сыллаах үлэтин иһин Илимниир оскуолатын учууталыгар, нэһилиэк депутатыгар Варвара Егорова оройуон депутаттарын Сэбиэтин грамотатынан бэлиэтэннилэр.
- Сунтаар улууһун баһылыга Анатолий Григорьев СР Ил Дархана Егор Борисов Махтал суругун таһаарыылаах, бэриниилээх үлэтин иһин полиция капитаныгар Петр Гороховка, бэйэлэрин кэмнэригэр оройуоммут сайдыытыгар сүҥкэн кылааттарын киллэрсибит үлэ, тыыл, муниципальнай сулууспа бэтэрээннэригэр Антонида Атласоваҕа, Илья Даниловка, Мария Лазареваҕа, Марфа Даниловаҕа, Андрей Петровка, Захар Босиковка, Николай Егоровка уо.д.а. улуус баһылыгын Бочуотунай грамоталарын туттартаата.
- Үөрүүлээх чаас кэнниттэн Сунтаар нэһилиэгин баһылыгын кубогар ыытыллар күрэс бастакы түһүмэҕэр – «Кыайыы хора» диэн ааттаах тэрилтэлэр холбоһуктаах хордарын көрүүгэ 12 хамаандаттан барыта 600-чэ киһи кытынна. Балаһыанньа быһыытынан хас биирдии хамаанда сэрии кэминээҕи уонна олохтоох автордар тылларыгар, матыыптарыгар ырыа толоруохтаах.
- Күрэскэ кыттыбыт тэрилтэлэр үчүгэйдик бэлэмнэммиттэрэ көстүүмнэриттэн, ырыаны толорууларыттан тута биллэр. Ордук көхтөөҕүнэн улуус дьаһалтатын холбоһуктаах хамаандата бэлиэтэннэ. Кинилэр 70 буолан кытыннылар. Оттон Сунтаар нэһилиэгин оҕо саадтарын үлэһиттэрин хора 50-ча киһилээх.
- Күрэс түмүгүнэн Сунтаар нэһилиэгин оҕо саадтарын тэрилтэлэрэ кыайыылааҕынан ааттаннылар. I степеннээх дипломунан «Алгыс» бэтэрээннэр кулууптара, II степеннээх дипломунан Сунтаардааҕы технологическай колледж, III степеннээх дипломунан олохтоох дьаһалта, «Добун» култуура киинэ, нэһилиэк библиотекатын коллективтарын хордара бэлиэтэннилэр.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети