Томпо улууһугар социальнай үлэһиттэр бэтэрээннэргэ бэлэхтэри туттардылар

Томпо улууһугар Аҕа дойду сэриитин түөрт кыттыылааҕа, 15 сэрии кыттыылааҕын огдообото уонна 102 тыыл бэтэрээнэ олороллор. Кинилэргэ социальнай харалта салаата улахан көмөнү оҥорор. Кыайыы 70 сылынан бары муниципальнай тэриллиилэргэ бэтэрээннэргэ бэлэхтэри туттардылар.


Хаандыгаҕа Аҕа дойду сэриитин үс кыттыылааҕа, үс сэрии кыттыылааҕын огдообото уонна 40 тыыл бэтэрээнэ баар. Оҕо искусствотын оскуолатыгар бэтэрээннэри үөрүүлээх чиэстээһин кэмигэр кэлбит кырдьаҕастарга социальнай харалта аатыттан Дьокуускайтан анал суруктаах фарфор чорооннору сакаастаан аҕалбыттарын туттардылар. Ол эрээри үгүс кырдьаҕас туора киһи көмөтө суох дьиэттэн тахсыбатын уонна сорохтор турар да кыахтара суоҕун болҕомтоҕо ылан, улуустааҕы социальнай харалта салаатын салайааччыта Антонина Решетникова, сүрүн специалист Зинаида Березина уонна Хаандыга оскуолатын алын сүһүөх кылаас үөрэнээччилэрэ Алина Колодезникова, Эрчим Андреев, Вова Леханов бэтэрээннэргэ дьиэлэригэр бара сырыттылар. Байыаннай таҥас кэппит оҕолор хоһоон ааҕан, ырыа ыллаан кырдьаҕастары үөртүлэр. Сорохтор долгуйан ытамньыйан ыллылар, махтанан барыларын сыллаталаатылар.
Саха сирин Правительствотын уурааҕынан 19 киһиэхэ анал биллэрэр тэрили туттардылар. Бу тэрил көмөтүнэн кырдьаҕастар ыксаллаах түгэҥҥэ «Суһал көмө» массыынатын, аймахтарын, социальнай үлэһити көмөҕө ыҥырыахтарын сөп.