Начальник эбээһинэһин быстах кэмҥэ толорор ис сулууспа полковнига Владислав Дзюба манна ананыан иннинэ РФ НТФС Сахалиннааҕы управлениетын начальнигын солбуйааччынан биэс сыл үлэлээбит. Холуобунай-исполнительнай систиэмэҕэ 2002 сыл бэс ыйыттан сулууспалыыр.

Төрөөбүт сирэ-уота – Иркутскай уобалас Тайшетскай оройуонун Старый Акульшет сэлиэнньэтэ. 1975 сыл балаҕан ыйын 22 күнүгэр күн сирин көрбүт. Кэргэннээх, икки оҕолоох.

Ааспыт бээтинсэҕэ эрэ көтөн кэлбит саҥа начальник өрөбүлгэ күрэхтэһиигэ кытта охсубут. Быраабы араҥаччылыыр уорганнар салайааччылара Макаров бэстилиэтиттэн ытыыга күрэс былдьаһыыларыгар. Бастакы миэстэни ис дьыала миниистирэ Владимир Прокопенко ылбыт, иккискэ ис дьыала миниистирин солбуйааччы Константин Неустроев тиксибит, үһүс миэстэҕэ Владислав Дзюба тахсыбыт.

Саҥа начальник чугастааҕы кэмҥэ холуонньалары кэрийэ барар былааннаах.