Тэрээһини «Аал Луук Мас» көмө фондата тэрийэн ыытта.  Күрэхтэһиигэ ити икки оҕо дьиэлэриттэн иккилии хамаанданы (кыралар уонна улахаттар) туруоран биэс түһүмэҕинэн күрэхтэстилэр. Түмүккэ I-гы миэстэни «Молодые соколы» Мохсоҕоллоох оҕо дьиэтин иитиллээччилэрэ, II-с миэстэни «Экстремалы» «Харысхал» иитиллээччилэрэ, III-с бочуоттаах миэстэни «Оптимистар» «Харысхал» иитээччилэрэ ыллылар. Хас биирдии миэстэлэспит кыттааччыны мэтээлинэн уонна грамотанан наҕараадалаатылар. Кубок уонна араас бэлэҕи туттардылар.  
Тэрээһин бүтэһигэр Чысхаан оҕонньор Хаарчааналыын оҕолору кэлэн иһэр саргылаах саҥа дьылынан эҕэрдэлээтилэр, сэмэй бэлэх туттардылар. Оҕолор барахсаттар бу тэрээһинтэн олус дуоһуйан, кэлэр сылга саҥалыы олоххо үктэнэллэригэр эрэл санаалаах үөрэ-көтө тарҕастылар.   

Петр Константинов – «Аал Луук Мас» көмө фондатын бэрэсидьиэнэ, тэрийээччи:
"Биһиги благотворительнай фондабыт 2014 сыллаахха тэриллибитэ. Бастаан общественнай организация курдук үлэбитин саҕалаабыппыт. Онтон «Аал Луук Мас» социальнай көмөнү оҥорор тэриллиини тэриммиппит. Быйыл саамай улахан тэрээһиннэринэн «Алаас» инбэлииттэр дьиэлэригэр бибилэтиэкэ биэрбиппитин, дьиэтэ суох хаамаайылары (бомжтары) босхо аһата сылдьыбыппыт ааттаталыам этэ. Ону таһынан Алтынньы 27 күнүгэр «Сэргэлээх» култуура киинигэр улахан кэнсиэр туруорбуппут. Онно 19 эстрада чаҕылхай сулуһа, кадетскай оскуола выпускниктара кэлэн кыттыыны ылбыттара. Киирбит харчы икки араагынан ыалдьыбыт саллаакка эмтэнэллэригэр, эпэрээссийэлэнэллэригэр барбыта.
Онтон бу буола турар тэрээһиммит «Саҥа дьыллааҕы оҕо мичээрэ» диэн ааттаан, оҕо дьиэтин иитиллээччилэригэр анаан тэрийдибит. Манна Мохсоҕоллоох уонна «Харысхал» оҕо дьиэлэрин иитиллээччилэрэ уонна үлэһиттэрэ кэлэн кыттыыны ыллылар. Бу тэрээһиммитин сылын аайы ыытылларын курдук билиҥҥитэ толкуйду иликпит эрээри, эһиилгэттэн үгэскэ кубулуйдар диэн баҕа санаалаахпыт.
Биһиги хас биирдии үтүө дьыаланы оҥорбуппутун кэннэ, оҕолор, инбэлииттэр үөрүүлэрин көрөммүт олус дуоһуйабыт, санаабыт чэпчээбиккэ дылы буолар". 

Айтал Карамзин – «Харысхал» оҕо дьиэтин физкультураҕа иитээччитэ, күрэх кыттааччыта:
"Маннык тэрээһин ыытыллара бастатан туран, спорт өттүгэр сайдаллар, эттэрэ-сииннэрэ эбдигирэр. Иккиһинэн, атын оҕолору кытары билсэллэригэр, кэпсэтэллэригэр, уопсастыбаннай миэстэҕэ хайдах тутта-хапта сылдьалларыгар туһалаах. Үсүһүнэн, хамаанданан үлэлииргэ үөрэнэллэр. Бүгүҥҥү тэрээһин үрдүк таһымнаахтык ааста дии саныыбын. Төрдүһүнэн, олох үчүгэй, сырдык өрүтүгэр баҕалара, тардыһыылара күүһүрэр.  Ону таһынан, саҥа дьыллааҕы тэрээһин буолан, оҕолор санаалара көтөҕүлүннэ аҕай. Маннык тэрээһиннэр өссө да элбии тураллара буоллар".