Бүлүү улууһун Чинэкэтигэр саҥа оҕо уһуйаанын үлэҕэ киллэрдилэр

Соторутааҕыта Бүлүү улууһун Чинэкэ сэлиэнньэтигэр 85 кырачааҥҥа анаммыт саҥа оҕо уһуйаанын тутан үлэҕэ киллэрдилэр. Оҕо саадын үөрүүлээхтик аһыыга «Бүлүү улууһа (оройуона)» муниципальнай оройуон баһылыга Сергей Винокуров, үөрэх управлениетын салайааччы Маргарита Куличкина, оройуон Сэбиэтин депутата Пелагея Томская, тутааччылар, Бүлүү куорат оҕо уһуйаанын сэбиэдиссэйдэрэ, төрөппүттэр, нэһилиэк олохтоохторо кыттыыны ыллылар.


«2000 үтүө дьыала» республикатааҕы хамсааһын чэрчитинэн тутуллубут 1047 кв. м иэннээх оҕо саада толору хааччыллыылаах, аныгы ирдэбилгэ толору эппиэттиир. Уһуйаан дьааһыла, кыра, орто уонна улахан оҕолорго бөлөхтөрдөөх.
Үөрүүлээх күн улуус баһылыга Сергей Винокуров нэһилиэк олохтоохторун, төрөппүттэри, иитээччилэри уонна иитиллээччилэри оҕо саадын саҥа дьиэтэ үлэҕэ киллэриллибитинэн истиҥник эҕэрдэлээтэ уонна наҕараадалары туттарда.

Үөрэх управлениетын начальнига Маргарита Куличкина Үөрэх министерствотын аатыттан оҕо саадын коллективыгар оонньуур миэбэл ыларга сертификат биэрдэ.Үөрэҕирии үлэһиттэрин идэлээх союзтарын улуустааҕы комитетын председателэ П.С.Томская эҕэрдэтин тиэртэ уонна үлэ бастыҥнарыгар наҕараадалары туттартаата. «Чернышевскай нэһилиэк» МТ баһылыга Артур Протопопов оҕо саадын сэбиэдиссэйигэр Клавдия Протопоповаҕа оонньуур балаһаакканы саҥардан оҥорууга диэн 100 000 солкуобайдаах сертификаты туттарда. Төрөппүт комитетын председателэ Мария Харлампьева кырачааннар уонна кинилэр төрөппүттэрин ааттарыттан саҥа сырдык, киэҥ-куоҥ дьиэ иһин тутааччыларга, салалтаҕа махтанна.