Тохсунньу 6 күнүгэр үөрэх управлениетын мунньахтыыр саалатыгар Юрий Николаевич үрдүк, орто уонна анал үөрэх кыһаларын студеннарын, үлэлиир ыччаты кытта көрүстэ. Манна улуус дьаһалтатын бэрэстэбиитэллэрэ, тэрилтэлэр салайааччылара сырыттылар.

«Ыччат дьарыктаах буолуутун проблемата. Быһаарыы суоллара. Сайдыы кэскиллэрэ» тиэмэҕэ ыытыллыбыт «төгүрүк остуолга» улуус баһылыга эдэр дьону кытта ыччат үлэлээх буолуутун, эдэр специалистар улуус тэрилтэлэригэр, предприятиеларыгар үлэлии хаалалларын хайдах ситиһэр туһунан кэпсэттэ.

Сарсыныгар, тохсунньу 7 күнүгэр, улуус баһылыга Аҕа дойду Улуу сэриитин кыттыылаахтарын, тыыл ветераннарын, общественнай сэбиэт, кырдьаҕастар сэбиэттэрин бэрэстэбиитэллэрин кытта көрүстэ. Итии чэйдээх остуол тула олорон Юрий Николаевич ааспыт сыл бэлиэ түгэннэригэр тохтоото, быйылгы дьыл соруктарын билиһиннэрдэ уонна Саҥа дьыллааҕы бэлэхтэри, улуус значоктарын туттартаата.

Ил Түмэн депутата И.В.Енторова, ветераннар улуустааҕы сэбиэттэрин бэрэссэдээтэлэ Е.И.Трифонова, тыыл ветерана, Уус-Маайа улууһун бочуоттаах олохтооҕо П.М.Адамова, тэрилтэлэр, предприятиелар салайааччылара көрсүһүү кыттыылаахтарын үүммүт Саҥа дьылынан эҕэрдэлээтилэр.

Аҕам саастаахтар эдэр саастарын эргитэн Моруос оҕонньору уонна Хаарчаананы кытта бииргэ араас куонкурустарга кытыннылар, доҕор-дьүөгэ дьонунаан ыллаан-туойан, үҥкүүлээн көнньүөрдүлэр. Түмүккэ бырааһынньык тэрийбит дьоҥҥо махтаннылар, 2015 сылга ситиһиилэри, саҥа кыайыылары баҕардылар.