- Любовь, эдьиийгинээн хаһааҥҥыттан иистэнэҕитий?
- Биһиги аҕабыт Арыылаахха олорон дэйбиир, быһах оҥороро, этэрбэс тигэрэ, улларара, илим өрөрө. Арааһа, ону батаммыт буолуо, иистэнэрбитин олус сөбүлүүбүт. Эдьийим бастаан утаа боростуой иистэнэр массыынанан үлэлиирэ. Быйыл тириини тигэр массыыҥка ылан, үлэбит быдан судургутуйда, хаачыстыбата да тубуста.
- Сымнаҕас оонньуурдары хаһааҥҥыттан оҥорор буолбуккутуй?
- Биһиги араас идеялары толкуйдаан олоххо киллэрэ сатыыбыт. Ааспыт сыл "Арай, сахалыы саҥарар сымнаҕас куукуланы оҥордоххо" диэн бэртээхэй санаа киирбитэ. Сонно наада буолар матырыйаалы атыыласпыппыт. Оонньуурдарбыт иһигэр холлофайберы угабыт. Москва куораттан "VIP-CHIP" модуллары атыылыыр тэрилтэттэн чиптарбытын сакаастаабыппыт. Кэмпилиэккэ аналлаах бырагыраама киирсэр. Ол бырагыраама көмөтүнэн  оонньуурдарбытын сахалыы саҥардарбыт. Оонньуурбут сүрүн аппараата түөһүн диэки баар, оттон кунуопката илиитигэр сылдьар. Тоҕо оннук гынныгыт диир буоллаххытына, оҕо оонньуурун кытары дорооболоһор, ол кэмҥэ кунуопка баттанар, оччоҕо оонньуур сахалыы хоһоону, биитэр эҕэрдэ тылы этэр. Ахсынньы ыйга саҕалаабыт буоламмыт, оонньуурдарбыт Куобах уонна 2015 сыл бэлиэтэ - Бараан. Саҥалара даҕаны үксэ саҥа дьыллааҕы эҕэрдэлэр, ырыалар, хоһооннор.Төрөппүт атыылаһар оонньуурун бэйэтин куолаһынан саҥарар гына оҥорон биэрэр баҕа санаалаахпыт.

- Үлэҕитигэр туох ыарахаттар баалларай?
- Биллэн турар, бастаан утаа ыарахаттар бааллара. Кэлин син үөрэнэн, уопутуран эрэбит. Арай үлэлиир буоламмын, өрөбүллэрбэр эрэ дьарыктанар кыахтаахпын. Биир оонньууру быһа холоон икки-үс күнүнэн тигэн бүтэрэбит. Онньуурбут саҥатынан бырааппыт Петя Демьянов дьарыктанар. Билигин мин үлэлээх, эдьиийим оҕо көрөн олорор буоламмыт, кыайан урбаанньыт буола иликпит. Инникитин бу үлэбитинэн биир эмит киһини урбаанньыт оҥорор санаалаахпыт. Бу аҕыйах хонуктааҕыта "ВКонтакте" социальнай ситимҥэ "Мэник Мэнигийээн" диэн бөлөҕү арыйбыппыт.

- Өссө атын тугу эмэ оҥороҕун дуу?
- Маны таһынан, сахалыы моһуоннаах дьэрэкээн магниткалары оҥоробун. Дьон-сэргэ маннык оҥоһугу олус биһириир эбит. Ол иһин, Чурапчыга ыытыллыбыт Манчаары оонньууларыгар үлэбинэн командировкаҕа бара сылдьан хас даҕаны оннук магнитканы атыылаабытым. Оҥоһуктарбын арай турагенстволары кытары дуогабардаһан, туристарга атыылаабыт киһи диэн баҕа санаалаахпын.