Ол курдук, Ньурба куоратын бэтэрээннэрин Сэбиэтин бэрэссэдээтэлэ Михаил Иванович Иванов кэпсээбитинэн, анал хамыыһыйа тэриллибит. Онно куорат, улуус дьаһалтатыттан, социальнай көмүскэл управлениетыттан, реабилитационнай киинтэн, общественнай түмсүүлэртэн уонна түөлбэлэртэн бэрэстэбиитэллэр кирбиттэр. Анал хамыыһыйа чилиэннэрэ хас бээтинсэ ахсын Ньурба куоратын ытык кырдьаҕастарыгар дьиэлэригэр тиийэн туох кыһалҕалаахтарын билсэллэр, сүбэ-ама биэрэллэр.

- Ньурба куоратыгар 2 -- Аҕа дойду улуу сэриитин кыттыылааҕа, 56 - сэрии бэтэрээнин огдообото, 5 – сэрии тулаайаҕа, 450-ча тыыл бэтэрээнэ олорор. Кинилэр бары сэрии ыар сылларын кэнниттэн төрөөбүт дойдулара чөлүгэр түһэрин, сайдарын туһугар көлөһүннэрин тохпуттара, сыраларын биэрбиттэрэ. Оттон билигин эдэр көлүөнэ кинилэргэ көмөлөһөр ытык иэстээх, - диир кини.

Михаил Иванович кэпсээбитинэн, анал хамыыһыйа чилиэннэрэ ааспыт бээтинсэҕэ «Ыраах Убайаан» микро-оройуонугар олорор бэтэрээннэригэр сылдьыбыттар. Онно ытык кырдьаҕастар ордук дьиэ өрөмүөнүгэр харчынан көмө оҥоһуллуутун, доруобуйаны көрдөрүүнү, о.д.а. кыһалҕаны хайдах быһаартарары ыйыталаспыттар. Маныаха кинилэр ыйытыылара, туруорсуулара уонна баҕа санаалара сурукка тиһиллэн, туһааннаах сирдэргэ уталытыллыбакка ыытыллан, хоруй ирдэниллэн иһэрин бэлиэтиир. Улуу Кыайыы 70 сылын көрсө, ытык кырдьаҕастарга хайаан да көмө оҥоһулларыгар эрэнэр. Итиэннэ маннык хабааннаах үлэни ньурбалар кэҥэтэн, бүтүн улуус үрдүнэн ыытар баҕалаахтарын этэр.