Улуустааҕы методическай сулууспа оскуолаҕа киириэх иннинээҕи үөрэхтээһиҥҥэ методиһа В.П. Жиркова педагогическай үлэ ветераныгар А.А. Слепцоваҕа бэлэх туттарар.

"Иитээччи көмөлөһөөччүтэ-2015" улуустааҕы куонкуруска Хонуу бөһүөлэгиттэн "Кэнчээри", "Чуораанчык", "Теремок", "Туллукчаан", "Сказка", Суон Тииттэн "Кэскил", Чыбааҕылаах нэһилиэгиттэн "Кустук", Соболоохтон "Чебурашка" оҕо уһуйааннарын тоҕус үлэһитэ биэс түһүмэххэ куоталаста. Кинилэри оройуон дьаһалтатын аатыттан Н.А. Слепцова, улуустааҕы методическай сулууспа оскуолаҕа киириэн иннинээҕи үөрэхтээһиҥҥэ методиһа В.П. Жиркова, "Туллукчаан" оҕо уһуйаанын сэбиэдиссэйэ Е.П. Жиркова мустубут бары педагогтары, педагогическай үлэ ветераннарын анал сылынан итиитик-истиҥник эҕэрдэлээтилэр.

Иитээччилэр көмөлөһөөччүлэрэ бэйэни билиһиннэрии, кырачааннар остуолларын сервировкалааһын, санитарнай-эпидемиологическай быраабылалары билиигэ тургутуу, оҕолорго дьарыктары ыытыы уонна талааны көрдөрүү түһүмэхтэригэр кытыннылар, оттон көрөөччүлэр ытыстарын харыһыйбакка таһыннылар, ис сүрэхтэриттэн "ыарыйдылар".

Көрөөччүлэр биһирэбиллэрин ылбыт Эжана Березкина.

Куонкурус түмүгүнэн Хонуутааҕы "Теремок" уһуйаан үлэһитэ Светлана Сидоренко бастакы миэстэҕэ таҕыста. Иккис миэстэни Суон Тииттээҕи "Кэскил" оҕо саадыттан Евдокия Старкова, үһүс миэстэни "Туллукчаан" уһуйаантан (Хонуу) Александра Мончурина ыллылар. Көрөөччүлэр биһирэбиллэрин Соболоох "Чебурашка" оҕо саадыттан Эжана Березкина ылла. Бары кыттыбыт иитээччи көмөлөһөөччүлэрэ харчылаах сертификат туттулар, кыайыылаахтар сыаналаах бирииһинэн уонна бочуотунай грамотанан наҕараадаланнылар.

Ити курдук оҕону оскуолаҕа киириэн иннинэ үөрэхтээһин сыла Муомаҕа саҕаланна. Маннык хабааннаах тэрээһиннэр сылы быһа ыытыллыахтара. Бүгүҥҥү күн туругунан Муома оройуонугар 11 оҕо уһуйаана, 1 оҕо саада-начальнай оскуола үлэлииллэр, онно 517 кырачаан сылдьар.