Жюри үлэтин үөрэх управлениетын оскуола иннинээҕи үөрэхтээһинин отделын начальнига Елена Томтосова салайда. Куонкуруска түөрт педагог кытынна: «Кэскилчээнэ» оҕо саадыттан Светлана Тимофеева, Мэҥэ Алдантан «Кыымчаан» оҕо саадыттан – Мария Чирикова, Матрена Яковлева, Диана Кривошапкина.

Куонкурус түөрт түһүмэҕинэн ыытылынна. Бастакы түһүмэх – практическай-үөрэх үлэтин быһаччы көрдөрүү. Светлана Тимофеева оҕолорго «Маша уонна эһэ» остуоруйа матыыбынан дьарык ыытта. Манна оҕолор математикаҕа билиилэрин тургуттулар. Матрена Яковлева «Оҕуруот астара – битэмииннэр», Мария Чирикова «Остуоруйа дойдутугар айан» дьарыктары ыыттылар. Логопед Диана Кривошапкина дорҕооннору туруоруунан дьарыктанан оҕолору кытта көмпүүтэргэ үлэлээтэ.

Иккис түһүмэх – «Айымньылаах сүрэхтэнии». Диана Криовшапкина «Логопедическай оонньуулар» диэн үлэтин билиһиннэрдэ. Матрена Яковлева «Оҕолор эт-хаан өттүнэн сайдыылара», Мария Чирикова «Үөрэхтээһин иннинээҕи тэрилтэҕэ ИКТ туттуу» интэриэһинэй бырайыагы көрдөрдүлэр.

Кыттааччылар хас биирдиилэрэ уран тарбахтаах эбит. Ол курдук, Светлана Тимофеева тиэстэттэн арааһынай кыыллары оҥорбутун көрдөрдө. Диана Кривошапкина эргэ хаһыаттартан хаппахтаах корзинаны өрбүт уонна талах өҥүнэн кырааскалаабыт. Ону таһынан оҕуруонан унтуу билэтин оҥорбут, таҥас кырадаһыннарыттан хартыыналары ойуулаан айар эбит. Матрена Артемовна эргэ кинигэлэртэн тарҕатыллар матырыйааллары хомуйбут. Мария Валерьевна тылы сайыннарыы үлэтигэр «Оҕуруот астара», «Фрукталар», «Таҥнар таҥас», «Дьыл кэмнэрэ» тиэмэлэри бэлэмнээбит.

Ураты түһүмэҕинэн педагогтар оскуола иннинээҕи үөрэхтээһин федеральнай государственнай үөрэтии стандартарыгар дискуссияҕа кыттыылара буолла. Айымньылаахтык үлэлиир иитээччилэр оҕолору кытта үлэ эйгэтигэр билиилэрин хайдах туһаналларын билиһиннэрдилэр.

«Оскуола иннинээҕи үөрэхтээһиҥҥэ» бырайыак түһүмэххэк кыттааччылар үлэ былаанын бырайыагын көмүскээтилэр.

Номинациялар маннык ананнылар: «Идэҕэ бэриниилээх буолуу иһин» - Светлана Тимофеева, «Оҕо тэрилтэлэригэр инновациялары киллэрии» - Мария Чирикова, «Бастыҥ айар бырайыак» - Матрена Яковлева. «2015 сыл бастыҥ иитээччитэ» ааты Диана Кривошапкина ылла. Кини республикатааҕы куонкуруска улуус чиэһин көмүскүөҕэ.