Уопсай балаһыанньа

Тэрийээччилэр — Саха Өрөспүүбүлүкэтин Үөрэҕин министиэристибэтэ, Саха Өрөспүүбүлүкэтин С.А. Новгородов аатынан «Бичик» национальнай кинигэ кыһата.

Куонкурус сахалыы тылынан ыытыллар.

Сыала-соруга

Үөрэнээччи уус-уран айымньыны ааҕыытын көҕүлээһин, билиитин сайыннарыы, кинигэҕэ тапталы, харыстабыллаах сыһыаны үөскэтии, дьиэ кэргэҥҥэ ааҕыы оруолун үрдэтии.

Оҕо ааҕыы нөҥүө доҕордоһуу сыаннаһын өйдүүрүн, ааҕыыттан дуоһуйууну ыларын ситиһии.

Холобур буолар бастыҥ ааҕар кылааһы быһаарыы.

Бибилэтиэкэ үлэтигэр көмөнү тэрийии.

Кыттааччылар

Куонкуруска өрөспүүбүлүкэ оскуолаларын 5, 6, 7 кылаастара кытталлар.

Куонкурус ыытыллар кэмэ, бэрээдэгэ, усулуобуйата

Кыттар сайаапканы 2015 сыл муус устар 31 күнүгэр диэри «Куонкурус» диэн суруктаан Интэриниэт нөҥүө маннык аадырыска тутабыт: ul-nki@mail.ru. Сайаапкаҕа кыттааччы кылааһа, оскуолата, улууһа, дэриэбинэтэ, куората, төлөпүөнэ, е-mail ыйыллар. Ыам ыйыгар киирбит сайаапкалар куонкуруска кыттыбаттар. Киирбит сайаапка регистрацияны ааспытын кэннэ, электроннай аадырыска куонкурус сиһилии усулуобуйата ыытыллыаҕа.

Куонкурус икки түһүмэхтээх.

I түһүмэх

Үлэ көрүҥнэрэ:

«Бибилэтиэкэ — билии түмэлэ»:

— хас биирдии кылаас оҕото бибилэтиэкэҕэ кинигэни ааҕыытын учуоттааһын.

«Түмсүүлээх үлэ — ситиһии төрдө»:

— кылааска суруйааччы айымньытынан тэрээһин;

— бастыҥ ааҕар дьиэ кэргэни талыы.

Бастакы түһүмэх балаҕан ыйын 30 күнүгэр түмүктэнэр.

II түһүмэх

— I түһүмэх түмүгүнэн бастыҥ көрдөрүүлээх биэс кылаас Дьокуускай куоракка 2015 сыл алтынньы 9 күнүгэр «Литературнай күрэскэ» кыттар.

Сыаналааһын уонна наҕараадалааһын

Кыттааччылар үлэлэрин сыаналыырга туспа хамыыһыйа тэриллэр.

Үс бастыҥ ааҕар кылаас дипломунан, сыаналаах бирииһинэн наҕараадаланар.

Куонкурус туһунан билсиһэр төлөпүөннэр: Үөрэх уонна оҕо литературатын эрэдээксийэтэ, төл.: 8(411)2-34-31-17, 8914 270 20 39.