- Библиотекабыт “Бочуоттаах ааҕааччы” диэн чиэстэбил ааты 2008 сыллаахха олохтообута. Маннык үрдүк аат библиотека үлэтигэр кыттыһар, бэйэтин кылаатын киллэрсэр киһиэхэ бэриллиэн сөп. 2008 сыллаахха бу үрдүк ааты 19 киһи ылбыта. 2009 сыллаахха – 5, 2010 с. - 1, 2011 с. - 2 киһиэхэ иҥэриллибитэ. Оттон «Бастыҥ ааҕааччы» анал ааты иҥэрии 1992 сылтан олохтоммута уонна сылын аайы биирдии киһиэхэ туттарыллар.

Быйылгы долгутуулаах күммүтүгэр «Бочуоттаах ааҕааччы» бэлиэлээх Анисимов Иван уонна “Бастыҥ ааҕааччылар” Николаева Луиза, Иннокентьев Никита, Массаев Игорь, ону сэргэ бэриниилээх ааҕааччыларбыт Дмитриева Александра, Антонов Геннадий, Семенова Светлана ыалдьыттаатылар, үүнэр көлүөнэҕэ баҕа санааларын тиэртилэр.

Салгыы ытыс тыаһыгар доҕуһуоллатан, 2014 сыл түмүгүнэн «Бастыҥ ааҕааччы» хаһаайыныгар махтал сурук, кинигэ бэлэх уонна анал ааты туттарыы буолла. Быйылгы чиэскэ-бочуокка үөрэх управлениетын психолога Наталья Петрачук тигистэ. Бэлиэтээн эттэххэ, кинилэр дьиэ кэргэнинэн кинигэни сөбүлээн ааҕаллара атыттарга холобур буолар. Наталья Викторовна ийэтэ Альбина Егоровна Николаева уруккуттанбиблиотека биир саамай эрэллээх доҕоро, бастыҥ ааҕааччыта. Оттон кырачаан уола, 4-с кылааска үөрэнэр  Саша  кыра эрдэҕиттэн ааҕарын олус таптыыр, -- диир библиотека сүрүннүүр специалиһа Лидия Семенова. Манна даҕатан эттэххэ, библиотека үлэһиттэрэ быйылгы кыайыылаахтарын Наталья Петрачугу “Библиотекаҕа улааппыт оҕо” диэн киэн тутта этэллэр.

Лидия Петровна кэпсээбитинэн, Ньурба 2 №-дээх оскуолатын 7 «А» кылааһын үөрэнээччилэрэ (кылаас салайааччыта Оксана Торохова) библиотеканы кытта ыкса доҕордоһоллор. Оҕолор бастыҥ ааҕааччылардыын сирэй көрсөн, кинигэни ааҕыы туһатын, киһи олоҕор сабыдыалын туһунан истэн улаханнык сэргэхсийбиттэр.

Истиҥ-иһирэх көрсүһүүгэ мустубут ыалдьыттар таабырын таайсан, ырыа ыллаан, көрдөөх оонньууларга кыттыһан үөрүүнү-көтүүнү көҕүлүттэн туппуттар.