Дьаҥхаадыга дьиэ кэргэттэр улуустааҕы күрэстэрэ ыытылынна

Тэрээһиннэр сүрүн сыалларынан дьиэ кэргэни олоххо көхтөөх, иллээх-эйэлээх буоларга, чөл олоххо, спорка угуйуу буолар. Биллэрин курдук, маннык тэрээһиннэргэ кыттар дьиэ кэргэттэр түмсүүлээх, сырдыкка, кэрэҕэ тардыһар бигэ туруктаах, атыттарга холобур буолар ыаллар.
Спортивнай күрэхтэһиигэ биэс хамаанда кыттыыны ылла. Мэҥэ-Хаҥалас дьиэ кэргэн уонна ыччат дьыалаларыгар управлениетын салайааччы Константин Захаров эдэр ыаллар үчүгэй бэлэмнээхтэрин бэлиэтээтэ.
Сэттэ араас таһымнаах уустук түһүмэхтэргэ дьиэ кэргэттэр «Көрдөөх эстафеталарга» төһө сымсаларын, сылбырҕаларын, түргэн туттунуулаахтарын көрдөрдүлэр. Бүтэйдээхтэн эдэр эрчимнээх Зоя, Андрей, уолаттара Вадим уонна Данил Слепцовтар чахчы кыахтаахтарын уонна үчүгэй бэлэмнээхтэрин көрдөрөннөр кыайыылаах таҕыстылар. Слепцовтар нэһилиэккэ ыытыллар бары спортивнай күрэхтэһиилэргэ көхтөөхтүк кытталлар эбит. Ыал ийэтэ фитнеһинэн утумнаахтык дьарыктанар, ыал аҕата сүүрүүнэн, тустуунан уо.д.а. көрүҥнэргэ үрдүк ситиһиилэрдээх эбит.
Үчүгэй бэлэмнээх Дьабыылтан Фекла, Семен, уоллара Роберт, кыыстара Руслана Аммосовтар иккис миэстэни ситистилэр. Үһүс бочуоттаах миэстэҕэ Майа сэлиэнньэтиттэн Туйаара, Станислав, кыргыттара Настя, Сандаара Стручковтар тигистилэр. Кыайбыт дьиэ кэргэттэр сыаналаах бириистэри ‒ велосипедтары тутаннар, үөрдүлэр-көттүлэр.

Күн иккис аҥарыгар Төхтүр кулуубугар «Эдэр дьиэ кэргэн ‒ 2015» конкурска түөрт ыал кытынна.Кыттааччылары «Ытык ыал» аатын ылбыт Төхтүр олохтоохторо Нина, Михаил Гурьевтар алҕаатылар. Дьиэ кэргэттэр бэйэлэрин билиһиннэрии, талааннарын көрдөрүү, Улуу Кыайыы 70 сылыгар аналлаах викторина боппуруостарыгар эппиэттээһин, бырайыактары көмүскээһин, спортивнай нүөмэргэ эт-хаан өртүнэн кыахтарын, умнуллубат бэлиэ түгэннэрин хаартыскаҕа түһэрбиттэрин көрдөрүү курдук түһүмэхтэри аастылар.
Бу күн спортивнай күрэхтэһиигэ иккис буолбут Дьабыыл нэһилиэгиттэн Аммосовтар бу куонкуруска эбии кыра уолларынаан Ренаттыын кыттаннар, кыайыыга дьулуурдарын бары өртүттэн көрдөрүлэр уонна туох да мөккүөрэ суох бастакы миэстэни ыллылар. Эдэр дьиэ кэргэн ийэтэ Фекла оскуолаҕа физика учууталынан, аҕалара Семен заправкалыыр станцияҕа операторынан үлэлииллэр, оҕолоро алын кылаастарга, оҕо саадыгар үгүс ситиһиилэрдээхтэр.
Төҥүлү эдэр ыала Елизавета, Герман, оҕолоро Слава, Кирилл, Айыына Неустроевтар иккис, Ороссолуодаттан Татьяна, Роман, уоллара Дамир Ивановтар үһүс уонна Төхтүртэн Антонина, Никита, оҕолоро Ганя, Света Дьячковскайдар төрдүс миэстэни ыллылар.
Нэһилиэктэр чиэстэрин көмүскээбит дьиэ кэргэттэргэ тэрийээччилэр, управление специалистара Ирина Назарова, Зоя Сергучева, Евдокия Тролукова уонна Афанасий Максимов махталларын тиэртилэр. Кыайбыт хамаандалар улуус чиэһин республикатааҕы күрэхтэһиилэргэ көмүскүөхтэрэ.