Отучча сыл зоотехнигынан үлэлиир Тамара Васильевна Федорова бу курдук кэпсээтэ: “Советскай Союз эстиитинэн сибээстээн уларыйыы-тэлэрийии буолан, совхоз эрдэхпитинэ сүүһүнэн киһи үлэлиир эбит буоллаҕына, билигин төһө да аччаатарбыт, коллективнай хаайыстыбанан үлэлээһини тутуһан кэллибит, араас да ааты ылына сырыттыбыт».

Кини этэринэн, кооператив 50-чэ үлэһиттээх, 300-чэкэ тонна үүтү туттарбыттар. «От үүммэтэҕин да үрдүнэн, тыһыынча тонна курдук оту оттоотубут. Өссө ордугун атыылыыр былааннаахпыт. Ынах сүөһүбут племенной боруода. 100 бырыһыан төрөтөн ылабыт», диир зоотехник.

Кооперативка осеменаторынан уопуттаах Александра Захарова уонна Алексей Типанов үлэлииллэр. Быйыл Саха сирин президенэ Егор Борисов тыа сиригэр улахан суолта биэрэн, Тыа сылынан биллэрбитин үлэһиттэр улаханнык астыммыттар, тоҕо диэтэххэ кинилэр ынах сүөһүнү, сылгыны олох аччаппат сыалтан үлэлии-хамныы сылдьаллар.

«Мин копперативы кытта биэс сылга дуогабардаһан ыанньыксыттыы сылдьабын. Ыал буолбутум биир сыл буолла. Ыанньыксыттыырым иһин ТХПК саҥа дьиэ тута сылдьар. Эдэр дьоҥҥо бу улахан көмө дии саныыбын, - диэн астынан кэпсиир эдэр киһи Алексей Филиппов.

Кини этэринэн, үлэлиир фермаларын таһыгар кэккэлэһэ ыанньыксыттарга анаан сынньанар дьиэ-уот тутуллан көҥдөйө бүппүт, ону таһынан сылгы базатын тутан, кооператив кэлэр сылга олоххо киллэриэхтээх.