Мунньахха промышленноһы сайыннарыы политикатын сүрүн тосхоллоро, онно үлэлэһэр институттар үлэлэрин күүһүрдүү, оробуочай идэлэри бэлэмнээһин таһымын үрдэтии, тастан киирэр табаары, бородууксуйаны, оборудованиелары солбуйуу уонна таска таһаарыыны өйөөһүн былааннарын тустарынан киэҥ кэпсэтии буолуоҕа.

«Чиэһинэй уонна көдьүүстээх экономика» Бүтүн Россиятааҕы народнай фронт Саха сиринээҕи салаатын оробуочай бөлөҕө бу конференция ыытылларын өйөөн «төгүрүк остуол» тэрийдэ, конференцияҕа өрөспүүбүлүкэ аатыттан ханнык этиилэри киллэрэри дьүүллэстэ. Ол курдук, промышленность сайдыыта норуот хаһаайыстыбатын бары салаатын атаҕар бигэтик туруорууга оруолун уонна дойду социальнай-экономическай сайдыытыгар төһүү күүһүнэн буоларын бэлиэтээтилэр. Саха сирэ промышленнай регион быһыытынан биллэр. Туһалаах сир баайа барыта хостонор. Хостонор эрэ диир кыахтаахпыт. Ол эбэтэр өрөспүүбүлүкэҕэ гааһы, ньиэби переработкалыыр кыахпыт суох. Билигин итини олоххо киллэрэр сорук күүскэ турарынан сибээстээн, Саха сиригэр промышленнай оҥорон таһаарыыга сөптөөх болҕомто ууруллан, минеральнай уонна углеводороднай сырьеттан бородууксуйалары оҥорон таһаарыыны баһылааһын ыытыллыахтааҕын ыйдылар. Итини тэҥэ, территориялары урутаан сайыннарыы бырайыактара (Хаҥаластааҕы индустриальнай паарка, Соҕурууҥҥу промышленнай кластер, алмаас-бриллиант комплекса, гааһы уонна ньиэби переработкалааһын) өрөспүүбүлүкэ социальнай-экономическай өттүнэн кыаҕырарыгар төһүү күүһүнэн буолуохтааҕын эттилэр. Бу сүрүннэрин билиһиннэрдим.

Мантан сиэттэрэн, Москваҕа бэс ыйыгар ыытыллыахтаах тэрээһиҥҥэ кыттыахтаах делегация «Чинчийэн үөрэтии, инновационнай чинчийиилэри олоххо киллэрии» диэн ситими үп-харчы өттүнэн өйөөн, сөптөөх түмүгү түргэнник ылыныыга уонна саҥа технологияны, оборудованиелары оҥоруу граныгар кыттар механизмы судургутутарга этии киллэрэригэр ыйдылар. Итини сэргэ массыынаны оҥорор собуоттары өйүүр судаарыстыбаннай программалары бэлэмнээһиҥҥэ уонна Саха сиригэр, Магадан уонна Иркутскай уобаластарга электроэнергия тарыыбын намтатарга эттилэр.