Кубогы көрсүбүт тэрилтэлэр былаахха бэйэлэрин ааттарын суруйбут лоскуйдарын эбии тигэллэр. Бу тэрээһин оҕолор төрөөбүт дойдуларыгар бэриниилээх буолалларын, бэйэлэрин норуоттарынан уонна дойдуларынан киэн тутталларын, бэтэрээннэрбит хорсун быһыыларын умнубаттарын туһугар ыытыллар.

Кыайыы Кубога Хаандыга бөһүөлэгин, Саһыл, Ыҥаа, Теплай Ключ, Томпо нэһилиэктэрин оскуолаларынан, уһуйааннарынан уонна эбии үөрэхтээһин тэрилтэлэринэн ыытылынна. Онтон олунньу 5 күнүгэр шахтердар олорор Дьабарыкы Хайа бөһүөлэгин оскуолатын үөрэнээччилэрэ Мэҥэ-Алдаҥҥа аҕаллылар. Улуус үөрэҕин салаатын бэрэстэбиитэллэрэ Елена Томтосова уонна Елена Винокурова Кыайыы Кубогын уонна былааҕы агро-оскуола директорыгар Александр Николаевка, «Кыымчаан» уһуйаан сэбиэдиссэйигэр Яна Захароваҕа уонна Искусство оскуолатын преподавателигэр Мария Комиссароваҕа туттардылар. Бу бэлиэ түгэҥҥэ Дьабарыкы Хайа оскуолатын үөрэнээччилэрэ хоһоон аахтылар, Мэҥэ-Алдан оскуолатын үлэһиттэрэ «Эх, дороги» ырыаны хорунан толордулар.

Мэҥэ-Алдантан Аҕа дойду Улуу сэриитигэр 86 киһи барбыта, онтон 27-тэ кыргыһыы толоонугар охтубута. Биир дойдулаахтарын хорсун быһыыларын туһунан кыраайы үөрэтээччилэр Давид Томтосов, Пантелеймон Дарбасов уо.д.а. элбэхтик суруйбуттара.

Эстафета олунньу 28 күнүгэр Советскай Союз Геройа Ф.М. Охлопков төрөөбүт дойдутугар, Кириэс Халдьаайыга түмүктэниэҕэ. Былаах оройуоннааҕы Кыайыы парадыгар кыттыаҕа уонна Кириэс Халдьаайы орто оскуолатын музейыгар хараллыаҕа.