- Мунньаҕы улуус баһылыга А.Т. Ноговицын иилээн-саҕалаан ыытта. Манна баһылыгы бастакы солбуйааччы А.А. Ноговицын, баһылыгы экономикаҕа солбуйааччы И.К. Матвеев, улуус прокурора И.В. Ядреев, полиция отделын начальнигын солбуйааччы И.Д. Свинобоев, Саха сирин илин эҥэринээҕи транспортнай инспекциятын старшай инспектора Е.Е. Винокуров кыттыыны ыллылар .
- Улуус баһылыга А.Т. Ноговицын сыллааҕы отчуот кэмигэр нэһилиэнньэ такси сулууспатын үлэтин туһунан санаатын эппитин иһитиннэрдэ. Онно сүрүннээн таксистар айан төлөбүрүн үрдэтэллэрэ, суолга кутталлаахтык уонна аһара түргэнник сылдьаллара, ону тэҥэ кэлиҥҥи бириэмэҕэ такси сулууспата арыгыны таһар сулууспаҕа кубулуйан эрэрэ ахтыллыбытын эттэ.
- Салгыы суол уонна транспорт надзорун үлэһиттэрэ санааларын эттилэр. «Дорожник» ХЭТ дириэктэрин солбуйааччы В.П. Захаров федеральнай суолга массыына көҥүллэнэр түргэнэ чааска 80 км буолуохтаах, оттон муниципальнай суолларга 60-тан үрдүө суохтаах диэн баар ирдэбиллэри санатта.
- Илин эҥэрдээҕи транспортнай инспекция старшай инспектора Е.Е. Винокуров: «Бары таксилар сөптөөх көҥүллээх, массыыналар техническэй ирдэбиллэргэ эппиэттиир буолуохтаахтар, өскөтүн ирдэбиллэр кэһиллэр түгэннэригэр ыстарааба ботуччу буолар", - диэтэ.
- Улуустааҕы ГАИ начальнига В.Д. Ефремов суоппардарага туһаайан маннык эттэ: «Массыынаны ыытыы култуурата баар буолуохтаах, аһара түргэнник сылдьыы үксээтэ, мантан сылтаан ол-бу саахал, быһылаан тахсар. Арыгы иһэн баран массыына уруулугар олорумаҥ диэн кытаанахтык сэрэтэбин. Суол быраабылатын тутуһуҥ диэн ыҥырабын».
- Мустубут суоппардар, диспетчердэр араас боппуруостары биэрдилэр, онно толору эппиэттэри ыллылар. Одьулуунтан киирэн эмсэҕэлээбит дьон аатыттан ийэлэр тыл этэн, суоппардарга сэрэхтээхтик сылдьалларыгар көрдөстүлэр.
- Улуус баһылыга А.Т. Ноговицын: «Таксистар ассоциациялара хайаан да баар буолуохтаах. Ассоциация такси сулууспатын суоппардара көмүскэллээх буолалларын хааччыйыахтаах. Бу маны барытын тэрийиигэ солбуйааччыбар И.К. Матвеевка сорудахтыам. Сөбүлэҥ түһэрсэн, балаһыанньаны оҥоруохпут, куоталаһыыга кыттыаххыт, бастыҥ суоппардар сыл түмүгүнэн ааттанан наҕараадаланыахтара, сулууспалар икки ардыларыгар эмиэ куоталаһыы биллэриллиэ.
- Иккиһинэн, «О безопасности дорожного движения» диэн программа ылыныахпыт, ассоциацияны кытары үлэҕэ хайа эрэ өттүгэр чэпчэтиилэр көрүллүөхтэрэ уонна олохтоохтор көрдөһүүлэринэн, айаннаан иһэр тиэхиникэ оскуораһын бэрэбиэркэлиир прибору хайаан даҕаны улуус бюджетыттан көрөммүт ылан үлэлэтиэхпит. Ону таһынан уулуссаларга камералар туруохтара.
- Оттон Чурапчы нэһилиэгэр үлэлиир таксистар арыгыны атыылааһыннара баар боппуруос, итини утары полиция үлэһиттэрин кытары бииргэ күүскэ үлэлиэхпит диэн этэбит. Онон улууспут иһигэр бу эйгэ бэрээдэктэниитигэр уонна суолга-иискэ саахал тахсыытын суох оҥорууга, ону таһынан таксистар таһымнарын үрдэтиигэ, үлэлэрин бөҕөргөтүүгэ үлэ ыытыллыаҕа.
- Олоҥхо ыһыаҕа чугаһаан иһэр, онуоха такси сулууспалара бары биир формалаах, ыалдьыттарбытын үрдүк култууралаахтык көрсөр гына тэриниэҕиҥ.
- Автовокзал тутуллуутун боппуруоһа үөрэтиллэ сылдьар. Бу тутуу бүттэҕинэ такси эйгэтигэр туһааннаах элбэх боппуруос быһаарыллыа.
- Такси сулууспаларын үлэһиттэрэ, үлэлээбиккит курдук үлэлээҥ, сокуону кэһимэҥ, дохуотта киллэриниҥ, бары бииргэ олохпут таһыма үрдүүрүгэр үлэлиэҕиҥ”, -- диэн мунньаҕы түмүктээтэ.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети