«Эмп сыаната ортотунан 50-100 солк эбилиннэ. Ол эрээри, дьон атыыласпытын курдук атыылаһар. Сороҕор ыйыллыбыт эмп Россияҕа оҥоһуллубут аналогын ыларга сүбэлиибит, ол эрээри атыылаһааччы омук дойдутугар оҥоһуллубуту туруорсар, талар», - диэтэ  Жатай бөһүөлэгэр баар аптека үлэһитэ.

Дьокуускай куорат аптекаларыгар эмиэ сыана үрдээбитин бигэргэттилэр.

Сыана үрдээһинэ эми хааччыйааччылартан быһаччы тутулуктаах. «РОСТА», «ПРОТЕК», «КАТРЕН» курдук поставщиктар Дьокуускайга үлэлииллэр. Кинилэр: «Биһиги сыананы олохтообоппут. Москваҕа, Новосибирскайга, Хабаровскайга баар сүрүн хонтуоралартан ыйытылаһыҥ», - диэтилэр.

Олоххо тутаах суолталаах эмтэр ахсааннарыгар 600-тэн тахса эмп киирэр. Балар сыаналарын государство сүрүннүүр уонна хонтуруоллуур.

Олоххо тутаах суолталаах уонна көннөрү эмтэргэ сыана 2014 сыл ахсынньытыттан 2015 сыл тохсунньутугар диэри 7,3% үрдээбитин министиэристибэ бэрэстэбиитэлэ эппитэ.

 «Аргысмедстрах» аптека үлэһитэ эппитинэн, сыл саҕаланыаҕыттан сыана 8-10% эбиллибит.

2015 сылга сыана үрдээһинэ 25 -30% диэри тиийиэҕин экспердэр сабаҕалыыллар.

Эмп сыаната 20 бырыһыан үрдүөн сөбүн туһунан дойду премьер-миниистирэ Дмитрий Медведев бэлиэтээн эппиттээх. Кини сыана үрдээһинэ солкуобай кууруһа халбаҥнааһытыттан тутулуктааҕын ыйбыта.