Мария Егоровна Охлопкова олоҕун бүтүннүүтүн саха норуота суруктаах-бичиктээх буолуутугар анаабыта. Кини ССРС-ка биир бастыҥ буукубар ааптарын быһыытынан биллэрэ. Оскуола боруогун саҥа атыллаабыт оҕолор бу буукубаарынан 1972 сылтан күн бүгүҥҥэ диэри ааҕарга-суруйарга үөрэнэллэр. Ол эбэтэр түөрт уонтан тахса сыл устата саха оҕолорун бастакы тапталлаах кинигэлэринэн буолан сылдьар.

Түбэ олохтоохторо саха норуота үөрэхтэниитигэр тугунан да кэмнэммэт сүдү өҥөлөөх, киэн туттар киһилэрэ Мария Егоровна Охлопкова сырдык аатын үйэтитиэхтэрин баҕараллар уонна маннык баҕа санааларын этэллэр:

1. Нам улууһун Түбэ орто оскуолатыгар кини аатын иҥэрэргэ.

2. Алын сүһүөх кылаас бастыҥ үөрэнээччилэригэр М.Е.Охлопкова аатынан өрөспүүбүлүкэ суолталаах бириэмийэни олохтуурга.

3. Итинник бириэмийэни алын сүһүөх үөрэхтээһин тэрилтэлэригэр уонна бастыҥ учууталларыгар аныырга.

4. Дьокуускай куорат саҥа уулуссатын М.Е. Охлопкова аатынан ааттыырга.

Түбэ олохтоохторо бу этиилэрин өрөспүүбүлүкэ салалтата, Нам улууһун дьаһалтата өйүөхтэригэр эрэнэллэр.