Матрена Ноговицына СИА корреспонденыгар: “Бастатан туран, тренердэр уонна төрөппүттэр оҕолорун кытта тэҥҥэ оонньууллара олус интэриэһинэй, үтүө түмүктээх буолар дии саныыбын. Ол иһин күрэхтэһиибитигэр төрөппүттэр, тренердэр эмиэ кытталлар. Эдэр дуобатчыттар манна кэлэн элбэх саҥа оҕону кытта билсиһэллэр, доҕордоһоллор, дуобаты сэҥээриилэрэ күүһүрэр. Кэлин, бары да дуобатчыт буолбатахтарын иһин, күрэхтэһии туһунан үтүө өйдөбүлү олохторун тухары илдьэ сылдьыахтара дии саныыбын”, - диэтэ.

Тэгил сиртэн тэҥнээхтэр мустан илин-кэлин түсүһүүлээх күрэхтэһии түмүгүнэн: ДЮСШ-5 хамаандата (тренер М.Н.Бырдыннырова) бастакы, «Оҕо дыбарыаһа» (тренер А.Г.Беляева, Дьокуускай куорат) иккис, ХИФУ бастакы хамаандата (тренер М.Н.Бырдыннырова) үһүс миэстэлэргэтахсан грамотанан, кубогынан наҕараадаланнылар.

Хамаандаҕа миэстэлэспит оҕолор уонна «Кыра саастаах кыттааччы» Юля Никифорова, Айсен Барахов анал бирииһинэн бэлиэтэннилэр. Үһүс миэстэни ылбыт Федор Федорович Смирников «Саамай кырдьаҕас кыттааччы», Мария НикитичнаБырдыннырова «Тренердэр тренердэрэ» бочуоттаах ааты ыллылар.

Сүрүн оонньуу кэнниттэн Рена ийэтэ Мария Николаевна Ноговицына тэрийиитинэн нуучча дуобатыгар блиц-турнир ыытылынна. Барыта 32 киһи кытынна. Блиц-турнирбыт боростуой буолбатах, «минньигэс» блиц-турнир. Хас дуоска аайы сакалаат уураллар. Оонньуу үс мүнүүтэ ыытыллар. Ол курдук, хотторбут киһи туоруур уонна минньигэс аһы ылар. Хас оонньуу аайы сакалааппыт ахсаана элбээн иһэр. Тыҥааһыыннаах киирсии түмүгэр ыалдьыппыт, Мэнэ-Хаҥаластан тренер Анна Чупрова кыайыылааҕынан таҕыста.

Кэлбит ыалдьыттар, күрэхтэһээччилэр тэрээһин үчүгэйин бэлиэтээн, Д.Д.Красильников аатынан Мугудай орто оскуолатын коллективыгар (директор А.А.Федоров), спонсордаабыт дьоҥҥо барыларыгар дириҥ махталларын тиэрдэллэр.

Рена уонна кини дьиэ кэргэнэ дьоҥҥо-сэргэҕэ, оҕолорго умнуллубат үтүө өйдөбүлү, сүрэххэ сөҥөр кэрэ түгэни өссө да бэлэхтии турдуннар. Түгэнинэн туһанан Ренабытыгар инникитин улахан түһүлгэлэргэ ситиһиини баҕарабыт.