- Эдьигээн бөһүөлэгэр кулууппут икки сыллааҕыта сууллубута. Арай хаҥас өттүнээҕи сыһыарыы тутуу ордубутун өрөмүөннүү охсон, үлэ тиһигэ быстыбатаҕа. Билигин онтукабыт (үлэлиир кабинет уонна үҥкүүһүттэр бэлэмнэнэр хосторо) кэнсиэргэ бэлэмнэнэр, сценарийдары суруйар, ыллыыр, үҥкүүлүүр, бырааһынньыктары тэрийэргэ мустар сүрүн түһүлгэбитинэн буолар. Байыаннай аҥардаах усулуобуйа диэххэ сөп. Ол да буоллар, санаабыт онтон түспэт. Улахан тэрээһиннэргэ, арыт, ДЮСШ саалатын арендалыыбыт, сороҕор улуустааҕы ОДьКХ хонтуоратын мунньахтыыр саалатын уларсабыт. Тэрээһин буоларыгар ыччаттар, эр дьон мустаннар онно ыскамыайкалары таһаллар. Дьоммут-сэргэбит барахсаттар оннук көхтөөхтөр, кэрэҕэ тардыһыылара күүстээх. Сэргэх дьонноох буоламмыт үлэбитин кыайа тутар буоллахпыт.

Уопсайынан, культура үлэтигэр саамай сүрүнэ – түмсүүлээх буолуу, дьону-сэргэни бэйэҕэ тардыы. Онон, кырдьыга, тугу барытын кэмигэр үмүрү тутан, ситиһэн олордохпут. Культура сылын түмүктүүр киэһэбитигэр куруук көмө, тирэх буолар дьоммутун эҕэрдэлээтибит. Бу да сырыыга «Оһуордар» эбээлэр кулууптара, «Осиктакан» фольклорнай үҥкүү коллектива, “Аяралдын” дьахталлар вокальнай ансамбллара, «Чолигда» драмколлектив, «Дэрэн» педагогическай үлэ ветераннарын кулууба, «Со бэе» (Мудрый человек)ыччат общественнай тэрилтэтэ уо.д.а. үөрүүнэн кыттаннар дьоро киэһэбитин ситэрэн-хоторон биэрдилэр, -- диир “Эйгэ” этно-культурнай киин директора Виктория Кузнецова. Кини бу күннэргэ оройуон дьаһалтата (баһылык Алексей Мандаров) культура управлениета үлэлээбит кыра дьиэтин үлэни-хамнаһы сайыннаралларыгар анаан биэрбититтэн улаханнык үөрэн олорор. Бу түбүктээх үлэҕэ өйөбүл, тирэх буоларын бэлиэтиир.

Үөрүүлээх тэрээһиннэргэ көхтөөхтүк кыттар түмсүүлэргэ, дьоҥҥо махтал суруктар туттарылыннылар. Оройуон баһылыгын гранын ааспыт сылга үрдүк таһаарыылаахтык үлэлээбит «Нулгин” этнокультурнайкиин (директор Анна Гоголева, Кыстатыам) ылан үөрүү-көтүү өрөгөйүн биллэ. Кинилэргэ бильярд остуолун атыылаһарга сертификат туттарылынна. Дьоро киэһэттэн оройуон олохтоохторо бары үөрэн, астынан тарҕастылар.