Улуустааҕы библиотека үлэһиттэрэ суруйааччы олоҕун, айар үлэтин туһунан кинигэ быыстапкатын уонна аныгы технологиянан оҥоһуллубут мультимедийнай киинэни билиһиннэрдилэр. С.П.Ефремовы кытары араас кэмҥэ алтыспыт дьон - П.А.Ойуунускай аатынан бириэмийэ лауреата П.Н.Харитонов-Ойуку, Суруйааччылар союзтарын бэрэссэдээтэлин солбуйааччы Н.Е.Калитин, прозаик-драматург В.Е. Васильев-Харысхал, РСФСР народнай артыыската А.И Кузьмина, Саха театрын бастакы профессинальнай режиссерун С.Григорьев кыыһа Л.С.Григорьева, Саха Республикатын норуотун хаһаайыстыбатын үтүөлээх үлэһитэ И.П.Заморщиков иһирэх тылынан аҕыннылар. Эҕэрдэ тылы эттилэр Хаҥалас улууһун баһылыгын эбээһинэһин толорооччу В.В.Афанасьев, Конституционнай суут бэрэссэдээтэлэ А.Н.Ким-Кимэн, улуустааҕы кииннэммит библиотекаттан Ф.Р. Варламова. Булгунньахтаах орто оскуолатын үөрэнэччитэ Алина Гермогенова суруйааччы туһунан бэйэтин иһитиннэриитин оҥордо.

Суруйааччы-драматург төрөппүт уола, Саха Республикатын тутуутун үтүөлээх үлэһитэ Виктор Степанович, кыргыттара - үлэ ветерана Светлана Евдокимова уонна муниципальнай сулууспа туйгуна Антонина Дьяконова аҕаларын туһунан иһирэх ахтыы оҥордулар.

2009 сыллаахтан улуустааҕы “Хаҥалас” уонна “Хангалас” хаөыаттар көҕүлээһиннэринэн С.П.Ефремов аатынан журналистскай бириэмийэ икки сылга биирдэ культура, духуобунас, литература, искусство темаларыгар суруйар дьоҥҥо олохтоммута. Бириэмийэни улуус икки хаһыаттара, улуустааҕы журналистар тэрилтэлэрэ, 1 Малдьаҕар нэһилиэгин дьаһалтата, улуустааҕы дьаhалта культураҕа уонна духуобунай сайдыыга салаата уонна суруйааччы дьиэ кэргэнэ туруораллар. Быйылгы юбилейдаах сылга бириэмийэ лауреаттарынан культура уонна духуобунай сайдыы управлениетын информационнай-методическай киинин специалиһа Семенова Галина,  Нөмүгү нэһилиэгин иһинэн үлэлиир "Дьулуур" түмсүү салайааччыта Татаринова Надежда буоллулар. Анал номинациялар Дьэр нэһилиэгин олохтооҕор, культура ветераныгар Сысоева Надеждаҕа, культура уонна духуобунай сайдыы управлениетын информационнай-методическай киинин салаатын сэбиэдиссэйигэр Степанова Надеждаҕа, Мохсоҕоллоох орто оскуолатын “Вектор” айар түмсүүтүгэр, журналист Тапыев Викторга туттарылыннылар.

Өктөмнөөҕү, Күөрдэмнээҕи уонна Нөмүгүтээҕи норуот театрдарын артыыстара С.Ефремов  “Ини-бии” , “Куорат кыыһа” , “Чуумпу Кытыл” драмаларыттан быһа тардыылары көрдөрдүлэр.