Көрсүһүүнү сонун сценарийынан ыыппыт саха народнай суруйааччыта Наталья Харлампьева бу тэрээһиҥҥэ сүрүн үлэни Томпо улууһун делегацията ылбытын астынан бэлиэтээтэ. Ол курдук, бу күн Анастасия Сыромятникова аатынан Томпо орто оскуолатын үөрэнээччилэрэ уонна «Күн кыырпаҕа» ансамбль оҕолоро мустубут дьону эҕэрдэлээтилэр.

Наталья Харлампьева Анастасия Сыромятникова саха литературатыгар саха дьахталлара үлэлэһэр дьоҕурдаахтарын, саҥа жанрдары баһылааһыҥҥа инники күөҥҥэ тахсалларын итэҕэппитин бэлиэтээтэ.

Көрсүһүүгэ кэлбит дьон суруйааччы кыргыттара Надежда уонна Светлана Спиридоновналар кыттыбыттарыттан олус астынна. СӨ Государственнай бириэмийэтин лауреата, СӨ культуратын үтүөлээх үлэһитэ Надежда Спиридоновна ийэтэ оччотооҕу кэм суруйааччылара кинилэр тыллара хас биирдии ааҕааччыга тиийэригэр уонна дьайарыгар олус эрэнэллэрин, Суруйааччылар союзтара киниэхэ иккис дьиэнэн буолбутун туһунан кэпсээтэ. Эдьиийдии-балыстыылар СӨ Государственнай Мунньаҕын депутата, «Саха» национальнай көрдөрөр-иһитиннэрэр хампаанньа салайааччыта Иван Андросовка ийэлэрин туһунан киинэ оҥорон көрдөрбүттэрин иһин махтанна.

Бу күн ааспыт үйэ ортолоругар литератураҕа киирбит суруйааччыларга Анастасия Спиридоновна кыһамньылаах, ийэлии, эдьиийдии сыһыанын махтана аҕыннылар. СӨ народнай суруйааччыта Николай Лугинов: «Оо, бу оҕолор барахсаттар кыһалҕалаах дьылҕаны талбыт эбиккит. Киирдиҥ эрэ киһи кыайан арахпат ыарахан дьыалатыгар ылсыбыккыт. Кытаатыҥ!» -- диэн алгыһын эппитин истиҥник аҕынна. Биллэрин курдук, Анастасия Сыромятникова айар үлэнэн умсугуйбут эдэр дьоҥҥо сүбэ-ама биэрэрэ, «Эдэр коммунист» хаһыакка «Хомус» түмсүүнү салайбыта. Кини салайбыт литературнай түмсүүтүгэр Вениамин Миронов, Альберт Бүлүүйүскэй, Василий Дедюкин, Варвара Потапова, Валентина Гаврильева уо. д. а. дарыктанан, литература айар аартыгар үктэммиттэрэ.

Народнай поэт Иван Мигалкин бүгүҥҥү дьоро киэһэ «буруйдааҕа» эдэр суруйааччыларга истиҥ, эйэҕэс сыһыаннааҕын, кинилэргэ наһаа эрэммитин бэлиэтээн туран, Москваҕа бииргэ сылдьыбыт кэмнэриттэн көрдөөх түгэннэри аҕынна.

«Кыыс хотун» романынан дьахталлартан бастакынан улахан жанрга ылсыбыт Анастасия Сыромятникова биир дойдулааҕа, Ил Түмэн тыа сиригэр уонна аграрнай политикаҕа сис кэмитиэтин бэрэссэдээтэлэ Дмитрий Саввин суруйааччы төрөөбүт-үөскээбит сиригэр Арыы Толооҥҥо өйдөбүнньүк бэлиэ туруорар буоллар, атын улуустарга үтүө холобур курдук буолуо этэ баҕа санаатын тириэртэ.

«Аал Луук мас» биэрии ыытааччыта Дмитрий Бястинов «Таатта үрэх үрдүгэр» ырыатынан, культура колледжын устудьуоннара уонна Саха театрын артыыстара туруорбут литературнай композициялара дьоро киэһэни өссө сэргэхситтилэр.

Анастасия Сыромятникова 100 сылыгар аналлаах дьаһаллар сылы быһа ыытыллыахтара. Олунньуга өрөспүүбүлүкэтээки научнай-практическай конференция тэриллиэ. Кулун тутар 19 күнүгэр Кириэс Халдьаайы орто оскуолатыгар хоһоон ааҕааччылар, уруһуй куонкурустара буолуохтара. Саха театрын артыыстара Томпо улууһугар гастроллуохтара. Бэс ыйын 20 күнүгэр Кириэс Халдьаайы сэлиэнньэтигэр юбилейдаах ыһыах ыһыллыа. Сэтинньигэ Байаҕантай нэһилиэгэр Анастасия Сыромятникова айымньыларынан испэктээкил туруоруллуо.

Анастасия Сыромятниковаҕа аналлаах дьаһаллары арыйбыт бу көрсүһүү кыттыылаахтара дьиэлэригэр «Чолбон» сурунаал бастакы нүөмэрин бэлэх тутан, «илии тутуурдаах, өттүк харалаах» төнүннүлэр. «Чолбон» сурунаал 2015 с. 1 нүөмэригэр филологическай наука кандидата С.Ноева А.Сыромятникова айымньыларын ырытыыта уонна суруйааччы Айысхаана Надежда Дмитриевналыын кэпсэтиитэ киирбиттэр.