Орто Халыма куораты улахан аҥаарын итиинэн хааччыйар “Южная” хочуолунайга тутааччылар (ОДьКХ буолбатах) анал фильтри туруорбаккалар, маннык хартыына буолла. Былырыын сайын оҥоруох буолбуттара да, кыаллыбатаҕа: “Туга эрэ сөп түбэспэтэҕэ”, — диэн хобдох эппиэти истибиппит.

Уһун кыһын устата түһэр хара быылы хараҕа да суох көрөр буолла. Мантыбыт куорат көстүүтүн эрэ буортулаабат, айылҕаҕа даҕаны улахан хоромньулааҕа биллэр. Куорат олохтоохторо кырдьыкпытын булаары, кыһалҕаны туоратаары ыҥырыыга илии баттаабыппыт.

Туһааннаах тэрилтэлэр даҕаны туора турбаккалар, бэйэлэрин хайысхаларынан үлэ ыыппыттара, ыыталлар аҕаны. Ол курдук, Айылҕа харыстабылын инспекциятын үлэһиттэрэ куорат устун сылдьан хаартан боруоба ылбыттара уонна Дьокуускайга лабораторияҕа ыыппыттара. Ол түмүгэ бу күннэргэ билиннэ.

Лаборатория куорат генеральнай былаанын тутан олорон, Орто Халыматааҕы гидрометео-сулууспа куорат чэрчитинэн тыал хайысхатын орто көрдөрүүлэригэр олоҕуран хаартан ыраастаныыны былааннаабыта. Онон сирдэтэн “Южная” хочуолунайтан саҕалаан Нефтебазаҕа диэри хаар ыраастаммыта.

Лабораторияҕа хаар химическэй састаабын чинчийбиттэрэ уонна “намыһах”, “орто”, “үрдүк” уонна “аһары үрдүк” диэн кэрдиистэргэ арааран түмүк оҥорбуттара. Онно “Южная” хочуолунай арҕаа өттүттэн В.А.Роббек аатынан уулусса, “Сказка” оҕо саадын кэтэх өттүнэн уонна Степанов-Ламутскай уулуссаларыгар аһары үрдүк киртийии баара быһаарыллыбыт. Ону кытта Саллаат күөлүгэр, саҥа дьиэлэр кыбаарталларыгар, Промбаза оройуонугар уонна аэропорт территориятыгар улахан киртийиилэр бааллара бэлиэтэммит. Көннөрү да киһи көрөрүнэн, хара буруо ити диэкинэн унаарыйар.

Салгыы Кузаковка диэки эргэ кылабыыһа, Строительнай уулусса, Озёрнай переулок, Анкудинка тамаҕын, муоста уҥуор, Речной переулок, Ардасенов уулуссатын, ОДьКХ эргэ ыскылаатын, аэропорт көтөр балаһатын эргин киртийии эмиэ «үрдүгүнэн» быһаарыллыбыт.

“Орто” көрдөрүү телевышкаттан өрүс диэки оройуоҥҥа, ОДьКХ тэрилтэтэ турар сиригэр уонна Ренц, Созонова уулуссаларга бэлиэтэммит.

“Намыһах” көрдөрүүлээххэ “Боотур” спорткомплекстан өрүс диэки өттө, Набережнай уулусса, Нефтебаза, “Дороги Колымы” тэрилтэлэрин эргин территория киирбит.

Үөрэтэн көрүү түмүгэр, “Южная” хочуолунайтан тахсар буруоттан сиргэ чох быыла уонна курунньук түһэр. Хаар уулларыгар бу быыл барыта сиргэ-буорга иҥэн хаалар. Ол содулун бэйэҕит да сэрэйдэххит буолуо. Сир тыыммакка, туох даҕаны үүнэн бытыгыраан тахсыа суоҕа. Курунньук хаары кытта иһэр уубутугар сөҥүө турдаҕа.

Чинчийээччилэр бииргэ болҕомтону уурары ыйбыттар. Ол курдук, орто оскуола ойоҕоһугар, суол уҥуор саҥа оҕо саада тутуллуохтаах территориятыгар аһары үрдүк киртийии баара быһаарыллыбыт. Ол иһин бу территорияҕа баар хаары уулларын кэтэспэккэ, массыынанан күртэрэри сүбэлээбиттэр.

Бу аҥардас хаар химическэй састаабын ырытан көрүү түмүгэ буолар. Оттон киһи доруобуйатыгар, бу кирдээх салгынынан тыыныыбыт содулун быһаарыы — атын кэпсэтии...

Онон эппиэттээҕи булар инниттэн бу түмүктэр Орто Халыматааҕы прокуратураҕа бэрилиннилэр.