Россия кардиологиятын уопсастыбатын Саха сиринээҕи отделениета ыыппыт бастакы мунньаҕа, биллэн турар, сүрэх-тымыр ыарыыларыгар ананна.

Барыта 47 киһи, Дьокуускай куорат эмтиир тэрилтэлэрин быраастара кытыннылар. Мунньаҕы регионнааҕы уопсастыба бэрэссэдээтэлэ, Медицина национальнай киинин кардиологияҕа диспансерын дириэктэрэ Күндүл Иванов арыйда. Сүрүн дакылааты өрөспүүбүлүкэтээҕи 2 №-дээх балыыһа суһал кардиологияҕа отделениетын сэбиэдиссэйэ Сардаана Павлова оҥордо. Бу сыл сүрүн соруктарын профессор Елена Кылбанова, СӨ Доруобуйа харыстабылын министиэристибэтин кылаабынай кардиолога Татьяна Томская, консультациялыыр-диагностикалыыр киин дириэктэрэ Татьяна Романова, куорат клиническэй балыыһатын кардиологияҕа отделениетын сэбиэдиссэйэ Лилия Мярина дьүүллэстилэр.

Кардиологтар регионнааҕы отделениеларыгар чилиэнинэн киириэн баҕалаах сылтан сыл аайы элбиир. Быйыл, сүрэх-тымыр ыарыыларын утары охсуһуу сылыгар өссө 20 быраас регионнааҕы отделениеҕа киирэргэ баҕатын биллэрдэ.

Саха сирин кардиологтара, мэлдьи да буоларын курдук, ыарыылары сэрэтэр үлэни актыыбынайдык ыытарга бэлэмнэр. Онуоха кардиология сулууспатын материальнай базаларын бөҕөргөтүү, кадрдары бэлэмнээһин боппуруостара быһаарыллалларыгар эрэллээхтэр.