Хантан эрэ булуллубут, регистрацияламматах саа, ботуруон, ытар, дэлби тэбэр тэрил сокуоннайа суох харайыыга киирсэр буоланнар, полицияҕа харчыга туттарыллыахтаахтарын эр дьон билэр. Санатар буоллахха, СӨ бырабыыталыстыбата буруйу оҥорууну сэрэтэр өрөспүүбүлүкэтээҕи программа чэрчитинэн, ити хайысхаҕа 1 мөл.солк. сууманы көрбүтэ. Бу уларыйыыларга олоҕуран, сокуоннайа суох харалла сылдьар сааны-сэбиргэли туттарыы иһин төлөбүр суумата үрдээбитэ. Ол курдук, буулдьанан ытар сааны, аптамааты, карабины туттарыы иһин – 8 тыһ. солк (урут 3 тыһ. солк. этэ), бултуур саа иһин – 6 тыһ. солк. (2 тыһ. солк. этэ), ботуруону туттардахха – 15 солк. (10 солк. этэ) төлөнөр.

Сергей Янович иһитиннэрбитинэн, төлөбүр суумата үрдээн, нэһилиэнньэ бэйэ баҕатынан араас сэби-сэбиргэли туттарыыта лаппа элбээбит. Холобура, ааспыт сылга 130 туттарыллыбыт эбит буоллаҕына, бу сыл 3 ыйыгар номнуо 207 буолбут. Маны сэргэ, биир уратыта диэн – сэби-сэбиргэли туттарыан баҕалаах дьоҥҥо полиция үлэһиттэрэ дьиэлэригэр тиийэн, бэйэлэрэ боротокуоллаан, хомуйан, илдьэ бараллар. Дьон актыыбынайдык аҕалан биэриитин иккис төрүөтэ - сокуоннайа суох харалла сылдьыбыт саатын-саадаҕын туттарбыт киһи холуобунай эппиэтинэстэн босхолоноро.

Подполковник Шапошников иһитиннэрбитинэн, 17 улууска саа туттуулаах биир да буруй тахсыбатах, оттон 11 улууска, төттөрүтүн, үрдээһин бэлиэтэнэр. Ордук чуолаан, Мирнэйгэ уонна Томпоҕо. Ааспыт сыл 3 ыйыгар киһини саанан ытан өлөрүү 6 чахчы тахсыбыт эбит буоллаҕына, бу сыл 3 ыйыгар – 3 чахчы.

Маны тэҥэ, сааны-саадаҕы харайыы усулуобуйатын кэһиигэ 2 тыһ. тахса боротокуол толоруллубут. Сүрүннээн, регистрациялаабакка уонна түбэһиэх уура сылдьыы иһин.

Автор хаартыскаҕа түһэриитэ