Манна 90-нус сылларга дьон бастакы дохсун көҥүл тыыны эҕирийэн, сопхуостар ыһыллан, тыа сиригэр бааһынай хаһаайыстыбалары тэринэн, онно тахсар утарсыылары, олоҕурбут олох укулаата, дьон майгыта-сигилитэ, өйө-санаата уларыйыыта итэҕэтиилээхтик арыллар. Аныгы ыччат өбүгэтин олоҕун, былыргы чахчылары биллэҕинэ эрэ норуот быһыытынан силигилии сайдыахпыт диэн санаатын суруйааччы кинигэтин нөҥүө тиэрдэр.

Билигин даҕаны айар үлэтин уоҕун ыһыктыбат биллэр прозаик сахабыт литературата сайдарыгар дьоһун кылаатын киллэрэр. Тумарча 90-нус сыллар дохсун долгуннарын олоххо хайдах буолбутунан сырдаппыт «Өбүгэ тыына» романын ааҕыҥ, урукку олох укулаата уларыйан, саҥа олоххо көһүүгэ дьон өйө-санаата уларыйыытын ахтан-санаан ааһыаҕыҥ.

Суруйааччы айар үлэтин интэриэһиргээччилэри олунньу 24 күнүгэр Саха театрыгар киэһэ 17 чааска Тумарча өрөгөйдөөх үбүлүөйүгэр анаммыт дьоро киэһэҕэ ыҥырабыт.