Сэбиэскэй саллааттар немец-фашист сэриилэрин Москва аннынааҕы кыргыһыыга төттөрү охсууларын 72 сылыгар аналлаах төгүрүк остуол кыттыылаахтара итинник санааҕа кэллилэр. Бу тэрээһин мэрияҕа ахсынньы 5 күнүгэр ыытылынна.

Сэбиэскэй сэриилэр 1941 сыллаахха өстөөхтөрү төттөрү охсуулара Улуу Аҕа дойду сэриитин хаамыытыгар сүүнэ оруоллаах. Бу элбэх хаан тохтуулаах кыргыһыы кыттыылаахтара геройдуу быһыы уонна Ийэ дойдуга таптал чаҕылхай холобурун көрдөрбүттэрэ, олор истэригэр үгүс Саха сирин олохтоохторо бааллара. Кинилэртэн икки киһи, Валентин Милютин уонна Лидия Коптелова тус бэйэлэринэн бу төгүрүк остуолга кыттыбыттарын ураты тутан бэлиэтиэххэ наада.

Тэрээһин кыттыылаахтара ветераннарга көмөтө суох, кинилэр хорсун быһыыларын үөрэппэккэ эрэ, эдэр көлүөнэ патриот быһыытынан хайдах санаммат диэн түмүккэ кэллилэр.

Итинник курдук суолунан сахалартан маҥнайгы Советскай Союз Геройа Федор Попов аатын сүгэр 20 №-дээх оскуола үөрэнээччилэрэ баран иһэллэр. Кинилэр сылын аайы герой төрөөбүт Сыымах нэһилиэгэр сылдьаллар, хорсун буойун аймахтарын кытта ситими быспаттар. Үөрэнээччилэр бэйэлэрэ Ф.Попов тус малларын муспуттар. 31-с оскуола патриотическай иитиигэ уопута эмиэ ветераннары кытта үлэҕэ сыһыаннаах. Оскуола оҕолоруттан студеннар эмиэ хаалсыбаттар. ХИФУ студеннарын этэрээттэрин штаба сыл аайы ветераннарга көмөлөһөр.

«Биһиги ветераннарбытыгар правовой уонна социальнай көмөнү оҥоруохтаахпыт. Дьокуускайга ыччаты патриотическай иитиигэ биир кэлим координационнай киин тэрийиэххэ баар», - диэн этии киллэрдэ куораттааҕы ветераннар Сэбиэттэрин бэрэссэдээтэлэ Антонина Дорофеева.