Бүгүн бырайыак кыттыылаахтара «Модернизация региональной системы постдипломного образования: ресурсы, тенденции и перспективы» диэн научнай-практическай конференцияҕа мустан түмүк таһаараллар. ИРОиПК директора Галина Алексеева эппитинэн, «үс сыллааҕыта биһиги туох буолуохтааҕы өтө көрбүппүт уонна киэҥ далааһыннаах былааннары туппуппут». «Оскуолаҕа киириэх иннинээҕи үөрэтии муниципальнай систематын уларытыы» хайысханан: Хаҥалас, Ньурба, Нерюнгри, Үөһээ Бүлүү, Чурапчы, Амма оройуоннарыгар итинник үөрэхтээһин араас өрүттэрин боруобалаабыттара. Ити уопут республика бары саадтарыгар тарҕаныаҕа.

Иккис хайысха - «Распространение на всей территории РФ моделей образовательных систем, обеспечивающих современное качество общего образования», институт хотугу улуустары хабарыгар кыаҕы үөскэппитэ. Научнай үлэһиттэр десаннара бары үөрэнэр предметтэринэн хотугу улуустарга сылдьыбыттара. Итини таһынан хотугу улуустар математика уонна нуучча тылын учууталлара Дьокуускайга таһымнарын үрдэппиттэрэ.

Үс сыллаах үлэ республика үөрэҕин методическай сулууспатын систиэмэтин уларытыы төрүөтүнэн буолуоҕа.

Итини таһынан бырайыак чэрчитинэн стажировка программалара оҥоһуллубуттара, Россия атын регионнарыгар уопуту атастаһыы ыытыллыбыттара. Саха сирин педагогтара бэйэлэрин уопуттарын 11 ыаллыы регионнарга тарҕаппыттара. Ону таһынан педагогтар Москва, Санкт-Петербург уонна Россия атын куораттарыгар курстары уонна стажировкалары ааспыттара.

Үс сыл устата квалификацияны үрдэтии курстарын 4458 педагогическай уонна салайар кадрдар ааспыттара, 2054 истээччи кыттыылаах семинардар ыытыллыбыттара.

Бүгүн конференцияҕа аналлаах ыалдьыттар кытталлар: профессор, МГГППУ социальнай педагогикаҕа факультетын декана Владимир Торохтий уонна РҮӨА педагогика теориятын уонна историятын Институтун педагогическай компаративистикаҕа лабораториятын старшай научнай сотруднига Игорь Сухин.