Санатар буоллахха, Саҥа дьыл бырааһынньыгын саҕана, 2014 сыл ахсынньы 30 күнүгэр, Дьокуускай куорат федеральнай суута кинини РФ ХК 30-с ыст. 3 чааһа – 105-с ыст. 1 чааһынан, ол эбэтэр, киһини соруйан өлөрүүгэ холонууга буруйдааҕынан билинэн, 9 сылга кытаанах режимнээх холуонньаҕа көҥүлүн быһарга бириигэбэрдээбитэ. Маны сэргэ, 1 мөл.солк. суумалаах моральнай, 160 тыһ.солк. материальнай хоромньуну төлүүргэ уурбута.

Бу уурааҕы сууттанааччы адвокаттара СӨ Үрдүкү суутугар ааһыммыттара. Уонна ити үөһэ этиллибитин курдук, кулун тутар 5 күнүгэр дьыаланы көрүү саҕаламмыта. Судебнай коллегия бэрэссэдээтэлэ - Руслан Иванов, судьуйалар - Валерий Окороков уонна Кирилл Кононов. Сууттанааччы да, эмсэҕэлээччи да адвокаттара уларыйбатахтар. Бэл диэтэр, судаарыстыбаннай буруйдааччы кытары уларыйбатах – куорат суутугар буруйдаабыт прокурор Эльвира Минеева. Өссө иккис буруйдааччы - Александр Балабаев.

Сууттанааччыны дьыаланы көрүүгэ аҕалбатахтар. 1 №-дээх Силиэстийэлиир изолятортан видео-сибээһинэн кытыннарбыттара – сибээс олус мөлтөх, Иванов саҥата чуолкай иһиллибэт, киниэхэ да суут кыттыылахтара тугу саҥараллара үчүгэйдик иһиллибэт этэ. Дьиҥэр, сууттанааччы, кини дьыалатын көрүүгэ, суут саалатыгар аҕалыллан кыттар бырааптаах.

Маны таһынан, тылбаасчыт Евгений Андреев мөлтөхтүк үлэлээн, сорох тыллары сыыһа тылбаастаан, сууттанааччы адвоката ону утаран, бэрэссэдээтэллээччи судьуйа тылбаасчыкка замечание оҥорбута.

Бу сырыыга эмсэҕэлээччи Сергей Мекюрдянов эмиэ хадатаайыстыба киллэрэн, суут быһаарыытынан, суруналыыстары уонна дьыаланы истэ кэлбит дьону, чугас аймахтары барыларын суут саалатыттан таһаартаабыттара. Инньэ гынан, судебнай коллегия уурааҕа тахсыар диэри суут мунньаҕа сабыылаах режиминэн барар.

Бүгүн, кулун тутар 10 күнүгэр, 14.00 чаастан, Виктор Иванов дьыалатын көрүү салҕаныаҕа. Адвокаттар киллэрбит хадатаайыстыбаларын ырытыһыы буолуоҕа, туоһу Харитонованы ыҥыран, кини көрдөрүүтүн истиэхтээхтэр. Үөһэ этиллибитин курдук, суут сабыылаах, суруналыыстары да, чугас аймахтары да киллэрбэттэр.