Онно саха эстрадатын артыыһа Виктор Иванов-Сиэйэ Уолун дьыалатын Дьокуускай куорат федеральнай суута сэтинньи 24 күнүттэн көрөн саҕалаабытын эппитим. Ол күн сууттанааччы Иванов уонна эмсэҕэлээччи Сергей Мекюрдянов, кини балта туоһу быһыытынан көрдөрүү биэрбиттэрин туһунан суруйбутум. Итиэннэ суут силиэстийэтин салгыыта ахсынньы 3 күнүгэр буолар, онно сууттанааччы уонна эмсэҕэлээччи ойохторо көрдөрүү биэриэхтэрэ диэн түмүктээбитим.

Дьэ, ол күммүт үүнэн, суруналыыстар эмиэ тиийдибит. Эмиэ икки өттүттэн киһи элбэх, саала кыараҕас. Бука бары киирэн, сааһыланан олордубут. Судьуйа эмиэ. Миэстэ тиийбэтинэн, сорохтор турдулар. Арай сууттанааччы эрэ аҕыйах мүнүүтэ хойутаан кэллэ. Кытаанах судьуйа киниттэн тоҕо хойутаабытын туоһулаһан баран, боротокуолга киллэттэрэн туран, замечание биэрдэ. Ханна да барбат туһунан баппыыска ис хоһоонун быһаара түһэн баран, «хаарчахтыыр миэрэҕин уларытан, силиэстийэлиир изоляторга хаайар туһунан хадатаайыстыба киллэриэххин сөп, хонбуой хаһан да хойутаабат, оччоҕо кэмигэр кэлэр буолуоҥ» диэн эмиэ да сэрэтэр, эмиэ да үгэргиир курдук саҥарда.

Онтон сууппут мунньаҕа, дьэ, саҕаланна. Биһиги сүрүн туоһулар көрдөрүүлэрин истээри, биир да тылы сыыска түһэримээри, кулгаах-харах иччитэ буолан олордубут. Онуоха баара бастакынан эмсэҕэлээччи Сергей Мекюрдянов туран, хадатаайыстыбатын киллэрдэ. Бука, адвокаттара суруйан биэрдэхтэрэ, ону ааҕан иһитиннэрдэ. «Ааспыт мунньахха суруналыыстар миигин хаартыскаҕа түһэрбэтиннэр диэн көрдөспүтүм да, хас да изданиеҕа хаартыскам тахсыбыт, «Саха» НКИК ханаалын «Сонуннарыгар» көрдөрбүттэрэ. Итинэн суруналыыстар мин бырааппын кэстилэр, оҕолорбут туох буолбутун билбэттэр, билиэхтэрин баҕарбаппын» диэн ханнык интернет-изданиелар, хаһыаттар кини быраабын кэспиттэрин ааттаталаата.

Адвокаттара, биллэн турар, өйөөтүлэр. Прокурор эрдэттэн бэлэмнэнэн, сурунан кэлэн, ити хадатаайыстыбаны толору өйөөтө. Ону ааһан, икки дьиэ кэргэн тус олоҕо көрүллэринэн, туоһулар көрдөрүүлэрэ суут силиэстийэтин кэмигэр киэҥ эйгэҕэ тахсыа суохтаахтарынан сибээстээн, суруналыыстар сылдьалларын хаарчахтыырга туруоруста. Суут силиэстийэтэ бүтүөр диэри боборго диэтэ.

Сууттанааччы хадатаайыстыбаны эмиэ өйөөтө. Кини адвокаттарыттан биирдэстэрэ «ол хаартыскаҕа иннигэр сууттанааччы Иванов турар, эмсэҕэлээччи ыраах омооно эрэ көстөр, онон, суруналыыстар кини быраабын кэспэтэтэхтэр, мин хадатаайыстыбаны утарабын, суут бэйэҥ быһаар» диэтэ. Оттон иккис адвокат суруналыыстар суут кыттыылаахтарын хаартыскаҕа түһэрэллэрин утарарын эттэ. Судьуйа өрүттэр санааларын истэн баран, 14 чаас 15 мүн. диэри тохтобул биллэрдэ.

Эбиэттэн киэһэ суут мунньаҕа балачча хойутаан саҕаланна. Судьуйа быһаарыытын, ирдэбил быһыытынан, туран эрэн иһиттибит. Суут эмсэҕэлээччи уонна судаарыстыбаннай буруйдааччы хадатаайыстыбаларын өйөөн, суруналыыстары саалаттан тахсарбытыгар модьуйда. «Саха сирэ» хаһыат хайаларын да хаартыскатын таһаарбатаҕа, туоһу Ноева көрдөрүүтүн бэчээттээбэтэҕэ, ол эбэтэр, ким да быраабын кэспэтэҕэ эрээри, уопсайынан суруналыыс аймахха туһуламмыт уураахха хапсан, тахсарбар тиийдэҕим.

Сокуон ирдэбилинэн, сабыылаах суут мунньаҕар туора киһи ким да сылдьыбат. Оттон чуолаан бу дьыаланы көрүүгэ дьиибэ быһыы-майгы буолла: атын көннөрү истээччилэр (аймахтар, доҕоттор, юрист-студеннар) бары олорон хааллылар, суруналыыстары эрэ таһаартаатылар. Итинэн сибээстээн биһиги, биэс суруналыыс, Дьокуускай куорат федеральнай суутун бэрэссэдээтэлин эбээһинэһин толорооччутун аатыгар сайабылыанньа суруйдубут. Дьоҥҥо-сэргэҕэ дьиҥ-чахчыны иһитиннэрэр-биллэрэр, тиэрдэр бырааппытын сөргүтүҥ диэн.

Онон, бу айдааннаах дьыала тугунан түмүктэнэрин бириигэбэр ааҕыллар эрэ күнүгэр билэр буоллубут. Ону ааҕааччыбытыгар, биллэн турар, тиэрдиэхпит.