Бастакы түһүмэххэ бэйэлэрин билиһиннэрдилэр. Иккис түһүмэҕинэн дьиэ хаһаайкалара астаан аҕалбыт фирменнай бүлүүдэлэрин хайдах астаабыттарын, туох састааптааҕын кэпсээтилэр. Онтон салҕыы бииртэн биир интэриэһинэй күрэхтэр буоллулар. Ол курдук ырыа-тойук дьиэрэйдэ, сорох хомуска оонньоото, сорох үҥкүүлээтэ.

Дьон болҕомтотун тарпыт түһүмэҕинэн авангарднай муода көрдөрөөһүнэ буолла, киһи көрөн сөҕөр. Манна салфеткаттан, кэмпиэт суутуттан киэһээҥҥи былааччыйалар, пакеттартан көстүүмнэр уо.д.а.

Көрүү күрэх түмүктэнэн долгутуулаах бириэмэ тиийэн кэлэр. Дьүүллүүр сүбэ күрэх түмүгүн билиһиннэрдэ. Кыттыбыт ыаллар бары араас номинацияларга тигистилэр уонна сыаналаах бириистэри тутан үөрдүлэр. Көрүү күрэх түмүгүнэн I миэстэни Бүлүүчээнтэн кэлбит Тимофеевтар дьиэ кэргэттэрэ ылан үөрүү өрөгөйүн биллилэр. Ыал аҕа баһылыга Вадим Иванович атаҕынан инбэлиит. Ол эрээри кини туохтан да иҥнэн турбат. Кэргэнин, оҕолорун, сиэннэрин батыһыннара сылдьан сайынын оттоон, күһүнүн сир астаан, оҕуруот аһын арааһын олордон бары бииргэ сылдьаллар.

Тимофеевтар дьиэ кэргэттэрэ 8 кыталык кыыстаахтар, 1 туйах хатарар уоллаахтар, элбэх сиэннээхтэр. Улахан хаһаайыстыбалаахтар, быйыл  16 ынах сүөһүнү кыстатан тураллар 20 кууруссалаахтар. Буолан ааспыт көрүү күрэххэ ыал ийэтэ Лидия Иннокентьевна кыргыттарынаан астаабыт сахалыы ас арааһын астаабыттар, баайыы арааһын быыстапкалаабыттар. Саамай дьон болҕомтотун тарпыт үлэлэринэн буолар олорор дьиэлэрин макетын испиискэ маһынан оҥорбуттара. Дьиэлэрэ 6 кырыылаах, 2 этээстээх, уһаайбаларыгар баар хотону, гараһы барытын оҥорбуттар. Улуус киинигэр бары киирэн күүс-көмө буоланнар түмсүүлээхтэрин көрдөрдүлэр. Кырдьык даҕаны «Тыа сирин үтүө-мааны ыала» диэн ааты ылыахтарын ыллылар.