Манна 11 сылгыны, 4 ыанар ынаҕы көрөн туруораллар эбит. Ону сэргэ оҕуруот аһын: хортуоппуйу, моркуобу, сүбүөкүлэни үүннэриинэн дьарыктаналлар. Теплицаларыгар оҕурсу рассадатын олордубуттар. Манна Абрамова Людмила Христофоровна уонна Никифорова Анна Юрьевна үлэлииллэр. Биология учуутала Анна Федоровна Степанова сибэккилэри үүннэриитинэн дьарыктанар.

Биир гектарга хортуоппуй олордоллор. Вологдаттан сиэмэ хортуоппуй 9 суордун аҕалан, олортон ханнык суорт биһиги климаппытыгар сөп түбэһэрин, ыарыыга ылларымтыата суоҕун,үчүгэй үүнүүнү биэриэн сөбүн иккис сылбытын кэтээн көрөллөр, мониторинг оҥороллор. Бу үлэнэн үөрэнээччилэр «Инникигэ хардыы» научнай-практическай конференцияҕа кыталлар.

Моонньоҕон үс суордун: «Хара кыталык», «Якутское» уонна «Гибрид» диэннэри үүннэрэллэр, селекционнай үлэнэн дьарыктаналлар. Аркадий Аркадьевич Тыа хаһаайыстыбатын министиэристибэтэ, олохтоох дьаһалта (баһылык А.С.Максимов) оскуолаҕа куруутун көмөлөһөллөрүн этэр. «Беларусь» МТЗ-82 тыраахтыр ылан, сайынын онон оттууллар эбит. Өрүс арыытыгар 60 гектар ходуһалаахтар.

«Инникитин агротуризмҥа үлэлэһиэхпитин баҕарабыт. Дьиэ-уот туттаммыт, хоту улуустар агро-оскуолаларын оҕолорун сынньатан, хаһаайыстыбаҕа үлэлэтэн, бэйэ оҥорбут аһынан аһатан үлэни тэрийиэхпитин саныыбыт, докумуонун оҥоро сылдьабыт. Ыччат дьон тыа хаһаайыстыбатыгар сысталларыгар усулуобуйаны тупсарыахха, оҕуруот аһын үүннэриигэ-харайыыга саҥа технологиялары киллэриэххэ наада. Оччоҕо эрэ биһиги тыабыт сирэ кэскиллээх буолуоҕа», - диэн агро-оскуола дириэктэрэ үлэтин-хамнаһын кылгастык билиһиннэрдэ.