Өймөкөөҥҥө Ил Түмэн дьокутааттара үлэлээтилэр

Ааспыт нэдиэлэҕэ Ил Түмэн Халыма-Индигир уокуругун дьокутааттара – олохтоох салайыныы боппуруостарыгар сис кэмитиэт бэрссэдээтэлэ Василий Местников уонна ОДьКХ уонна тутууга сис кэмитиэт бэрэссэдээтэлин солбуйааччы Юрий Садовников Өймөкөөн оройуонугар үлэлээтилэр.


Норуот итэҕэллээхтэрэ бу иннинэ Муома улууһун бары кэриэтэ нэһилиэнньэлээх пууннарыгар сылдьыбыттара. Уус-Ньара олохтоохторо дьокутааттары кытта көрсүһүүгэ кинилэри өрүү долгутар кыһалҕаларын – олох-дьаһах коммунальнай хаһаайыстыбатын, олорор дьиэ сертификаттарын ылыы туһунан - тиэртилэр.
Василий Местников уонна Юрий Садовников улуус дьаһалтатыгар оройуон муниципальнай Сэбиэтин, нэһилиэктэр дьокутааттарын, тэрилтэлэр салайааччыларын уонна улуус дьаһалтатын исписэлиистэрин кытта көрүстүлэр. Оттон киэһэ Култуура дьиэтигэр нэһилиэнньэни кытта көрсөн кэпсэттилэр.
Улуус уонна нэһилиэк дьокутааттарын кытта көрсүһүүгэ Василий Местников Саха сиригэр ааспыт сылга муниципальнай тэриллиилэр баһылыктарын быыбарыгар сыһыаннаах сокуон ылыллыбытын туһунан иһитиннэрдэ, олохтоох салайыныы уорганнарыгар боломуочуйалары биэрии курдук суолталаах сокуоҥҥа эмиэ тохтоото. Дьокутаат бэлиэтээбитинэн, муниципальнай тэриллии ханнык боломуочуйалары бэйэтигэр ылынарыттан үбүлээһин тутулуктаах. Онон нэһилиэктэр дьаһалталара ханнык боломуочуйаны поселение, ханныгы оройуон таһымыгар хаалларары быһааран, саҥа Устаап ылыныахтаахтар.
- Бу олус дьоһуннаах сокуон. Докумуону болҕойон ааҕыҥ, бары ымпыгын-чымпыгын ырытыҥ. Дьэ уонна сөптөөх быһаарыныыны ылынын, - диэн сүбэлээтэ Василий Александрович.