Кыбартыыраларга түүнүк үөскүүр сүрүн төрүөтэ туохханый?

Ону билээри СӨ тутууга уонна дьиэни-уоту кэтээһиҥҥэ судаарыстыбаннай управление начаалынньыга Николай Атастыровы көрсөн кэпсэттибит.

 КПД-лар олус эргэрдилэр

– Бу Россия үрдүнэн баар улахан кыһалҕа, – диир Николай Акимович. – Дьокуускай олохтоохторо кыбартыырабыт иһэ түүнүк, сииктээх буолла диэн үҥсэргээбиттэрэ сэттис-ахсыс сылыгар барда. Түүнүк, тэллэй үөскүүр сүрүн төрүөттэрин этэр буоллахха, маннык. Бастакытынан, 464-с сериялаах эргэ КПД (крупнопанельнай) уонна 112-с сериялаах тоҕустуу мэндиэмэннээх дьиэлэргэ бырайыак быһыытынан биир эрэ вентиляционнай ханаал баар (ону нууччалыы естественная принудительная вентиляция диэн ааттыыллар). Кыбартыыраҕа киирбит салгын хайаан да вентиляциянан тахсыахтаах. Салгын оонньооһуна хайаан да баар буолуохтаах. Ирдэбил быһыытынан салгын сөкүүндэҕэ 0,2 м түргэннээхтик хамсыахтаах.

464-с сериялаах КПД-лар 1970-с бүтүүлэригэр тутуллубуттара. Баларга үчүгэй капитальнай өрөмүөн ыытыллыан наада.

Тупсаҕай өрөмүөн кутталлаах

- Билигин дьон кыбартыыраларын куоталаһа-куоталаһа тупсаҕай гына өрөмүөннүүллэр. Ол курдук, салгыны таһаарбат да, киллэрбэт да гына стеклопакет түннүгү туруораллар. Тиэрмэс курдук оҥороллорун түмүгэр сибиэһэй салгын тастан кыайан киирбэт буолар. Мантан сылтаан ордук үөһээҥҥи кыбартыыралар түннүктэрэ, ботолуоктара сиигирэн барар. Физика сокуонунан сылаас салгын аллараттан үөһэ тахсар. Вентиляционнай ханаал иһигэр салгын барыыта-кэлиитэ тохтуур. Дьиэни көрөр-истэр хампаанньалар саас дьиэ үрдүгэр баар хаары ыраастыыллар эрээри, үксүлэрэ вентиляционнай ханаалы ыраастаабат. Итинтэн сылтаан дьиэ сиигирэр уонна түүнүк, тэллэй уйаланан үөскээн тэнийбитинэн барар.

Бастаан утаа салайар хампаанньаларыгар этиэхтээхтэр

– Кыбартыыра иһэ сииктэннэҕинэ, бастатан туран, дьиэни көрөр-истэр салайар хампаанньаҕа (УК), олорор дьиэ табаарыстыбатыгар (ТСЖ) этиэхтээхтэр. Боппуруоһу кыайан быһаарбатахтарына, Роспотребнадзорга, Борокуратуураҕа үҥсүү түһэриэхтээхтэр. Биллэн турар, Борокуратуура дьыаланы биһиэхэ ыытар. Онон олохтоохтор, кыһалҕаны түргэнник быһаартарар сыалтан, тута биһиэхэ кэлбиттэрэ быдан ордук. Биһиги аадырыспыт: Дьокуускай к., Аммосов уул., 8-һа, төлөпүөннэрбит: (4112) 34-26-44, 34-50-53, 42-56-79, факспыт: (4112) 34-26-4, электроннай почтабыт: sakhagasn@mail.ru, stroynadzor@sakha.gov. ru