Тамара Ивановна — СГУ медицинскэй факультетын бүтэрбитэ, төрөөбүт оройуонугар 1983 сыллаахха төннөн кэлэн баччааҥҥа диэри улуус киинигэр учаастактааҕы педиатрынан үлэлии сылдьар. «Доруобуйа» Национальнай бырайыагы ситиһиилээхтик олоххо киллэрии, доруобуйа харыстабылын программатын тупсарыы, бииригэр диэри саастаах, тулаайах, сокуоннай саастарын ситэ илик оҕолору диспансеризациялааһын, Национальнай программа чэрчитинэн кыһыл ымынаҕы, гепатиты утары быһыыны оҥоруунан толору хабыы, төрөөбүт оҕо сертификаттарын кытта үлэ, сылын аайы ыытыллар ыарыыттан сэрэтэр көрүүлэри оҥоруу, учаастагар баар 700 оҕону эмтээһин, түүҥҥү дьуһуурустубалар, ыҥырыылар, хас күн аайы кырачааннар уонна улаатан эрэ оҕолор доруобуйаларын туһугар кыһамньы — бу Тамара Ивановна күннээҕи соруктарыттан сорохторо эрэ.

Кини бэйэтин идэтигэр бэриниилээх, үрдүк квалифициялаах специалист, сүүнэ уопуттаах, дириҥ билиилээх киһи. Итини таһынан, Тамара Осипова — эрэллээх доҕор, үтүө санаалаах кэрэ дьахтар.