Бырааһынньыктыы киэргэтиллибит саалаҕа дьон лыык курдук толору муһунна. Улууспут баһылыгын солотугар киириитин эҕэрдэлии ыраахтан-чугастан бэрт үгүс ыҥырыылаах ыалдьыт, улууспут нэһилиэктэрин баһылыктара кэлбиттэр.

Үрдүк сололоох ыалдьыттар ортолоругар СР Правительствотын Бэрэссэдээтэлин солбуйааччы Игорь Никифоров, СР доруобуйатын харыстабылын министрэ Александр Горохов, СР агропромышленнай комплексын сайдыытын уонна айылҕа харыстабылын департаменын салайааччыта Анастасия Афанасьева, ыаллыы алмаастаах Мирнэй улууһун баһылыга Ришат Юзмухаметов, Бүлүү улууһун депутаттарын Сэбиэтин бэрэссэдээтэлэ Гаврил Корякин, Үөһээ Бүлүү улууһун баһылыгын бастакы солбуйааччы Андрей Неустроев, депутаттарын Сэбиэтин бэрэссэдээтэлэ Семен Михалев, Ньурба улууһун баһылыга Борис Попов, Мэҥэ-Хаҥалас улууһун депутаттарын Сэбиэтин бэрэссэдээтэлэ Андрей Находкин, Дьокуускай куорат мээрин солбуйааччы, биир дойдулаахпыт Петр Ефремов, «Анаабыр Алмаастара» ААО отделын начальнига, биир дойдулаахпыт Афанасий Постников, Сунтаар улууһун Дьокуускай куоракка бэрэстэбиитэлэ, РФ Федеральнай Мунньаҕын Сэбиэтин чилиэнэ А.К.Акимов көмөлөһөөччүтэ Александр Петров, олохтоох бэйэни салайыныы департаменын старшай референэ Иосиф Мискяев бааллар.

Бастаан Сунтаар улууһун быыбардыыр хамыыһыйатын секретара Сергей Иванов быыбар түмүгүн иһитиннэрэн туран, А.В.Григорьевка Сунтаар улууһун баһылыга буолбутун туоһулуур докумуонун туттарда. Ол кэннэ баһылыкпыт бар дьонун иннигэр андаҕарын эттэ.

А.В. Григорьевы республикабыт Ил Дархана Е.А. Борисов, Ил Түмэн бэрэссэдээтэлэ А.Н. Жирков, РФ Федерациятын Сэбиэтин чилиэнэ А.К. Акимов эҕэрдэлэрин ааҕан иһитиннэрдилэр.

Саха омук сиэринэн саҥа баһылыкка анаан-минээн тигиллибит сахалыы таҥаһы сунтаардар Далбар Хотуммут, СР култууратын үтүөлээх үлэһитэ М.И.Егорова уонна улуустааҕы бэтэрээннэр Сэбиэттэрин бэрэссэдээтэлэ В.Н.Догойдонов кэтэртилэр. Аҕа баһылыгы алҕаан СР култууратын туйгуна М.М.Евсеев-Кураһаай Мэхээлэ алгыс этэн амалыйда.

Дьэ ити курдук, улууспут баһылыга Анатолий Васильевич Григорьев солотугар киирэр сиэрэ-туома үрдүк өрө көтөҕүллүүлээхтик барда.

Анатолий Васильевич эппитин курдук, тылынан эрэ сомоҕолоспокко, дьиҥ дьыаланан улууспут сайдарын туһугар бука бары бииргэ түмсэн, эйэ дэмнээхтик үлэлиирбит наада.