«Республика улуустара» сериянан улуустартан аан бастакынан «Амгинский улус: история, культура, фольклор» кинигэ тахсыбытынан аммалар киэн тутта кэпсииллэр. Александр Еремеевич төрөөбүт улууһугар уҕараабат таптала, тыа хаһаайыстыбатын үлэһит, хоһуун дьонун ааттарын үйэтитэргэ дьоһун кылаата көстөр.

Уонча сыл иһигэр элбэх ахсааннаах, араас ис хоһоонноох кинигэлэри бэлэмнииргэ баһылык солбуйааччыта Прасковья Емельянова төһүү күүс буолар. Ол курдук, кини салайыытынан уонна бырайыагынан халыҥ кээмэйдээх, элбэх хаартыскалаах барыта 4 альбом-кинигэ күн сирин көрдө: «Амгинский район – вехи столетия», «Сыллар быыстарын сэгэтэн, кэлэр кэскили түстэһэн», «От игр предков к идеалам Олимпизма», «Культура Амги: наследие и современность (Амма култуурата: сайдыы суолунан)».

Соторутааҕыта улуус киинигэр «Амма култуурата: сайдыы суолунан» диэн кинигэ сүрэхтэниитэ буолан ааста. Улуус баһылыгын солбуйааччы Прасковья Емельянова, культура управлениетын начальнига Евдокия Сутакова, библиотекарь Елена Попова архыып докумуоннарын хасыһан, нэһилиэнньэни кытта үлэлээн, матырыйаал хомуйсан, сүҥкэн үлэни оҥордулар. Маны бэлиэтээн, кинилэргэ махтал суруктар туттарылыннылар. Итинник махтал сурук тыа хаһаайыстыбатын миниистиригэр Александр Артемьевка бэрилиннэ.

Амма улууһун социальнай-экономическай сайдыытыгар улахан кылаатын уонна өр сыллаах үтүө суобастаах үлэтин иһин «Бичик» Национальнай кинигэ кыһатын кэлэктиибигэр (дириэктэр Август Егоров) саҥа талыллыбыт баһылык Николай Архипов Бочуоттаах грамотаны кытта үрүҥ көмүс бэлиэни биэрдэ. Инникитин да ситиһиилээхтик бииргэ үлэлэһиэхпит диэн туран, саҥа талыллыбыт баһылыкка Николай Архиповичка кыһа аатыттан эҕэрдэ сурук туттарылынна.

Билиҥҥи түргэн тэтимнээх олоххо бүгүҥҥү ситиһиилэри, сэдэх талааннаах дьону кинигэҕэ киллэрэн, үйэтитэн испэтэххэ, күн-дьыл аастаҕына суураллан, умнуллан, сүтэн-оһон хаалыан сөп. Онон, атын улуустар аммалартан холобур ылан, дойдугут үтүө аатын, чулуу дьонун үйэтитэргэ тиэтэйиҥ!