Анаабыр оҕолоро Бүтүн Россиятааҕы уонна республикатааҕы куонкурустарга дьоһун ситиһиилэннилэр

Ааспыт ый бүтэһигэр Санкт-Петербург куоракка РФ Культуратын министерствота уонна «Наше будущее» аһымал фонда көҕүлээһиннэринэн «Золотой Феникс» диэн норуоттар икки ардыларынааҕы XI фестиваль-куонкурус буолбута. Онно дойду араас муннуктарыттан үҥкүү кэлэктииптэрэ, цирковой студиялар, ырыа ансаамбыллара күрэстэспиттэрэ.

Куонкуруска Анаабыртан Сааскылаах орто оскуолатын «Тэбэй» вокальнай ансаамбылын солистара Назарова Саина, Виницская Аня, Туприн Далан, Говорова Дайаана, Болуров Вова, Андросов Күндүмэн, Спиридонова Айыына салайааччыларынаан Туприна С.С. ситиһиилээхтик кыттан кэллилэр. Кинилэр долганныы ырыалары ыллаан, долган культуратын киэҥ түһүлгэҕэ таһааран «Золотой Феникс» куонкурус II степеннээх лауреатын аатын ыллылар, кубогынан, дипломунан уонна Сочи куоракка аны сайын ыытыллар «Великая Россия» Бүтүн Россиятааҕы куонкуруска ыҥырылыннылар.

Оттон улуустааҕы гимназия «Хоһуун» ансаамбылыттан Корнилов Давид, Акакиев Алеша, Порохонько Эрчим, Толбонов Харысхан, Федоров Эрэл Дьокуускай куоракка ыытыллыбыт«Ырыа барахсан» республикатааҕы куонкуруска кыттан I степеннээх лауреат аатын ыллылар.
Улуу Кыайыы 70 сылын бэлиэтээһин чэрчитинэн ыытыллыбыт «Бриллиантовые нотки» норуоттар икки ардыларынааҕы II фестиваль- куонкуруска улуус тумус туттар «Анаабыр алмаастара» образцовай үҥкүү бөлөҕө «Народный сценический танец» номинацияҕа I степеннээх лауреат уонна үҥкүү бөлөхтөрүн таҥастарын-саптарын көрөр түһүмэххэ «Северное сияние на долганские мотивы» диэн тиэмэҕэ долган норуотун оһуордаах-мандардаах таҥаһын-сабын көрдөрөн I степеннээх лауреат үрдүк аатын ылла. Онон Сочи куоракка буолуохтаах «Золотая нота» Бүтүн Россиятааҕы фестиваль-куонкуруска ыҥырыы тутта. Салгыы Дьокуускай куоракка ыытыллыбыт «Золотой олень» хореографическай искусство куонкурус-фестивалыгар «Народная сценическая хореография» уонна «Балетмейстерская работа» диэн номинацияларга тиксэн ЮНЕСКО анал дипломунан наҕараадаланна. Кулун тутар 28-30 күннэригэр «Көмүс дорҕоон» эдэр талааннар республикатааҕы VII куонкурустарыгар ситиһиилээхтик кыттан I степеннээх лауреат үрдүк аатын уонна «Лучший танцевальный коллектив» номинация хаһаайынынан буолла. Инньэ гынан 2016 сыл тохсунньу 16-29 күннэригэр Таилаҥҥа буолуохтаах куонкурус-фестивальга кыттар быраабы ылла.
Оҕолорбут ситиһиилэрэ аҥардас культура эйгэтинэн эрэ муҥурдаммат. Ол курдук, Сааскылаах орто оскуолатын үөрэнээччилэрэ Арьянова Лилиана, Боронцоева Лена, Семенова Настя, Туприна Саина муус устар 4-6 күннэригэр Дьокуускай куоракка буолбут республикатааҕы Саха сирин кэскиллээх математиктарын уонна физиктарын «Дьоҕур-2015» XXI фестивалларыгар иккис лигаҕа «Математический бой» күрэскэ ситиһиилээхтик кыттан III степеннээх дипломант аатын ыллылар.