Дьокуускай куораттан В.Манчаары аатынан спорт национальнай көрүҥнэрин киинин начальнига Гаврил Мохначевскай уонна остуол оонньууларын инструктора Надежда Белолюбская кэлэн Томтор сэлиэнньэтин тэрилтэлэригэр сылдьан өбүгэ оонньууларын туһунан сырдаттылар, хаамыскаҕа уонна хабылыкка күрэхтэһии ыытан, дьон-сэргэ биһирэбилин ыллылар.

Сонун күрэскэ 70-80-ча саастаахтар көхтөөхтүк кыттан, аан бастакы мэтээллэри ыллылар. Үгүс дьон оҕолорун, сиэннэрин өбүгэ оонньууларыгар үөрэтээри хаамыска, хабылык атыыластылар.

Күрэхтэһии түмүгэр хаамыскаҕа бастакы миэстэни А.В.Вензель, иккис миэстэни У.Н.Дягилева, үһүс миэстэни У.С.Винокурова ыллылар.

Оҕолор да көрөн турбатылар, кырдьаҕастартан хаалсыбакка кытыннылар. Оскуола үөрэнээччилэрэ Вова Белак, Георгий Софронов, Алгыс Атласов бириистээх миэстэлэргэ тигистилэр.

Хабылыкка В.Н.Прокопьев, З.И.Сыроватская уонна И.А.Ефремова тэҥнээхтэрин булбатылар. Ону сэргэ саамай кырдьаҕас кыттааччылар Л.П.Винокурова, Р.И.Готовцева инники күөҥҥэ сырыттылар, атыттарга холобур буоллулар.

Ыалдьыттар эһиил Өймөкөөн улууһугар өссө улахан күрэхтэһиини ыыта кэлиэх буолан үөртүлэр.