Литература сылыгар: Кэбэргэнэҕэ Николай Абыйчанин кэпсээнинэн «Өкүлүүнэчээн маныыһыт» испэктээк туруордулар

Быйыл ыам ыйыгар биир дойдулаахпыт, Саха сирин Суруйааччыларын сойууһун чилиэнэ, суруналыыс, СР культуратын үтүөлээх үлэһитэ, норуокка «Абый Корчагина» диэн аатынан биллибит Н.В.Слепцов-Абыйчанин төрөөбүтэ 90 сылын бэлиэтиэхпит.

Соторутааҕыта Кэбэргэнэ Култуура киинин сценатыгар «Өкүлүүнэчээн маныыһыт» диэн Николай Абыйчанин кэпсээнинэн Дьокуускайдааҕы култуура уонна искусство колледжын IV кууруһун устудьуона Д.С.Слепцов испэктээк туруорда.
Дьоро киэһэ суруйааччы олоҕун, айар үлэтин сырдатыыттан саҕаланна. Кини хоһооннорунан литературнай композиция көрдөрдүлэр.


Испэктээккэ оонньоотулар: Саха Республикатын үтүөлээх учуутала Акулина Слепцова, эбээн тылын учуутала, СӨ үөрэҕириитин туйгуна Евдокия Степанова, эбээн тылын учуутала, СӨ үөрэҕириитин туйгуна А.Скрябина, начаалынай кылаас учуутала Ю.Луговкина, омук тылын учуутала А.Слепцова. Саамай кыра кыттааччы - «Тугутчаан» уһуйаан иитиллээччитэ Эмма Сидорова. Кылаабынай геройу Акулина Слепцова сиэнэ Ира Степанова оонньообута көлүөнэлэр утумнаһыыларын туоһутунан буолла.
Көстүүмнэри Россия уопсай үөрэхтээһинин туйгуна Татьяна Слепцова бэлэмнээн тиктэ.
Өтөрүнэн буолбатах үчүгэй тэрээһин буолла диэн көрөөччүлэр биһирээбиттэрин биллэрдилэр. Көстүүмнэрэ, уота-күөһэ, туруоруута табыллыбыт, оонньуур дьон толорууларын таһыма, чаҕылхайа астыннарда.
Бу киэһэни «Эдек» Култуура киинин уус-уран салайааччыта М.Слепцова, сыана бэтэрээнэ Р.Корякин, саха тылын учуутала М.Очирова салайан ыыттылар.
Акулина Дмитриевнаттан (маныыһыт Өкүлүүнэчээн прототиба) айымньы туһунан санаатын үллэстэригэр көрдөстүм:
«Николай Абыйчанин - чахчы айылҕаттан айдарыылаах, талааннаах суруйааччы. «Чучунаа уонна Суланньа» диэн сэһэнин хаста да аахпытым. Николай Васильевич ыарыһах, инбэлиит буолан баран, нуучча улуу суруйааччыта Н. Островскай «Ыстаал хайдах хатарыллыбыта» романын геройа Павел Корчагиҥҥа майгынныыр олоҕу олорбутун ыччат билиэн наада.
Оттон бу «Өкүлүүнэчээн маныыһыт» диэн кэпсээҥҥэ эбээн норуотун биир күннээҕи олоҕо көстөр. Кинилэр чахчы айылҕа оҕолоро буолалларын ойуулуур. Кини бу сэһэнигэр дьиҥнээх олоххо буолбут түбэлтэни истибитин суруйбут. Мин оччолорго 9 саастаах этим».