Бу күн Александра Степановнаны СӨ народнай поэта Наталья Харлампьева, суруйааччы Николай Калитин уо.д.а. суруйааччылар, суруналыыстар, доҕотторо, аймахтара эҕэрдэлээтилэр. Төрөөбүт-үөскээбит Чурапчытын олохтоохторун ааттарыттан Чурапчы улууһугар өр сылларга баһылыктаабыт Иннокентий Аммосов уонна Горнай улууһун Мытаах нэһилиэгин музейын дириэктэрэ, ону сэргэ орто оскуола учуутала Владимир Парфенов Дархаанаҕа алгыс тыллары анаатылар.

Бу күн Дархаананы хоһоонньут уонна прозаик быһыытынан айымньыларын ырыттылар. Юрист идэлээх Александра Константинова ыарахан үлэттэн быыс булан, айар үлэнэн дьарыктанарын биһирииллэрин биллэрдилэр. Оттон бүгүҥҥү күн буруйдааҕа: «Суруйар, этэр-тыынар баҕа санаа олус элбэх да, бириэмэ кырыымчыгыттан санаабыппын олоххо толору киллэрэ иликпин билинэбин. Ол да иһин, сүрэхпин долгутар, дууһабын ыарытар иэйиилэрбин ардыгар хаһыакка суруйан чэпчииргэ дылы буолабын», – диэн кичэм санаатын бар дьонун кытары үллэһиннэ.

Кырдьыга да, Дархаана чуолаан «Саха сирэ» хаһыакка бэчээттэтэр суруйуулара кини билиҥҥи олох мөкү өрүттэрин көннөрөргө дьулуһарынан, ыччат уонна аҕам саастаах дьон икки ардыгар сыһыаны, эдэр көлүөнэ итэҕэстэрин-быһаҕастарын уо.д.а. күннээҕи олох көстүүлэрин аһаҕастык этэринэн уратылаахтар.

Дархаана айар биэчэрин ыалдьыттара өттүк харалаах, илии тутуурдаах төнүннүлэр. Бүгүҥҥү биэчэр «буруйдааҕа» ыҥырыылаах ыалдьыттарыгар буруолуу сылдьар «Оһуордаах оҕо сааһым» кинигэтин бэлэх туттаран ыытта.

Саҥа кинигэҕэ суруйааччы сибэкки ойуулаах оҕо сааһын былааччыйатыттан саҕалаан, олоҕун дьикти иэйиилээх түгэннэрин умнубакка, субу баардыы ойуулуурунан сөхтөрөр. Хас биирдии кэпсээҥҥэ кини ийэтигэр, аҕатыгар, төрөөбүт алааһыгар, бииргэ үөскээбит үөлээннээхтэригэр бириэмэ булан билиммэккэ хаалбыт иэйиитэ, таптала этиллэргэ дылы.

Айар биэчэри Мария Герасимова-Сэҥээрэ, Алексей Павлов уонна Дархаана бэйэтэ иилээн-саҕалаан ыыттылар. Ырыаһыттар Мария Данилова, Фатина Иванова, Алексей Калининскай истиҥ ырыаларынан киэргэттилэр.